26 чэрвеня, Мінск /Кар. БЕЛТА/. Беларус Алег Юрэня заняў трэцяе месца ў веславанні на байдарках і каноэ на II Еўрапейскіх гульнях, перадае карэспандэнт БЕЛТА.
У вырашальным заездзе на 1000 м на вяслярным канале ў Заслаўі беларус адстаў ад пераможцы больш як на секунду - +1,355 сек. Першае месца ў Балінта Копаса з Венгрыі - 3 мін 30,96 сек, а сярэбраным прызёрам стаў Фернанда Пімента з Партугаліі - +0,112 сек.
У гэтым сезоне на этапе Кубка свету ў Познані на гэтай дыстанцыі Алег Юрэня заняў другое месца, уступіўшы на фінішы толькі партугальцу Фернанда Піментэ.
Сёння на вяслярным канале ў Заслаўі адбудуцца таксама фінальныя заезды ў мужчын на 1000 м у каноэ, у байдарцы-двойцы і каноэ-двойцы. Жанчыны вызначаць лепшых на 500 м у байдарцы-двойцы. У гэтым відзе Беларусь прадставяць Марына Літвінчук і Вольга Худзенка.
На вяслярным канале ў Заслаўі з 26 па 27 чэрвеня 350 спартсменаў разыграюць 16 камплектаў узнагарод.-0-
