11 лістапада, Мінск /Кар. БЕЛТА/. Мінчанка Аліна Гарнасько стала ўладальніцай Кубка Беларусі па мастацкай гімнастыцы сярод спартсменак 2003 года нараджэння і старэйшых у мнагабор'і, паведамілі карэспандэнту БЕЛТА ў прэс-службе Беларускай асацыяцыі гімнастыкі.
Сталічная спартсменка бліскуча справілася з обручам, мячом і булавамі, зарабіўшы ў суме 85,350 балаў. Серабро ў Юліі Еўчык (79,900), бронза ў Ганны Каменшчыкавай (78,400).
У камандным першынстве сярод майстроў спорту, юніёрак і прэ-юніёрак перамаглі Аліна Гарнасько, Валерыя Бяляўская і Улада Болзан. Другімі сталі Настасся Салас, Ірына Карніевіч і Сафія Ахрымчук. На трэцюю прыступку п'едэстала ўзняліся Юлія Еўчык, Дзіна Агішава і Дар'я Вышнікава.
Сярод спартсменак 2004-2006 гадоў нараджэння ў тройцы лепшых Ксенія Сцешыц, Дар'я Ткачова і Дзіна Агішава, 2007-2008 гадоў - Аліна Рэчкіна, Варвара Юшко і Улада Болзан.
У групавых практыкаваннях на вышэйшую прыступку п'едэстала ўзнімаліся грацыі з Гродна, БФСТ "Дынама" і Рэспубліканскага цэнтра алімпійскай падрыхтоўкі.-0-
