4 чэрвеня, Мінск /Кар. БЕЛТА/. Пры распрацоўцы законапраекта аб радыяцыйнай бяспецы ў Беларусі ўлічаны ўсе рэкамендацыі МАГАТЭ, паведаміў карэспандэнту БЕЛТА намеснік старшыні Пастаяннай камісіі па пытаннях экалогіі, прыродакарыстання і чарнобыльскай катастрофы Палаты прадстаўнікоў Мікалай Васількоў.
Паводле слоў дэпутата, палажэнні законапраекта заснаваны на абноўленых міжнародных патрабаваннях у галіне радыяцыйнай бяспекі. "Улічваюцца ўсе рэкамендацыі місіі МАГАТЭ па комплекснай ацэнцы рэгулюючай інфраструктуры ядзернай і радыяцыйнай бяспекі (IRRS), што праводзілася ў Беларусі ў 2016 годзе", - расказаў Мікалай Васількоў. Ён дадаў, што законапраект абмяркоўваўся з юрыстамі, спецыялістамі Інстытута радыялогіі МНС, вывучалася таксама грамадская думка.
Новым у прававым рэгуляванні будзе замацаванне на заканадаўчым узроўні палажэнняў аб экспертызе радыяцыйнай бяспекі, кансультаванні ў галіне яе забеспячэння, дзяржаўнай рэгістрацыі тыпу крыніцы іанізуючага выпрамянення.
Парламентарыі разлічваюць, што ў першым чытанні законапраект будзе разгледжаны да канца бягучай сесіі.-0-
