24 мая, Мінск /Кар. БЕЛТА/. Тытул "Каралева Вясна Беларусі - 2017" заваявала студэнтка Віцебскага дзяржаўнага тэхналагічнага універсітэта Сняжана Міхейцава, паведамляе карэспандэнт БЕЛТА.
Свабодная, мэтанакіраваная і моцная духам Сняжана шмат часу праводзіць у трэнажорнай зале. Дзяўчына паспяхова спалучае ў сабе грацыёзнасць, пачуццёвасць і жаноцкасць. Яна душа кампаніі і генератар ідэй.
Званне "Першая віцэ-Каралева Вясна" заваявала студэнтка Гродзенскага дзяржаўнага ўніверсітэта імя Янкі Купалы Алёна Енка. Дзяўчына - будучы фіналіст. Яе захапленне - музыка і вакал.
Прадстаўніца Полацкага дзяржаўнага ўніверсітэта Хрысціна Нікіфарава стала ўладальніцай тытула "Другая віцэ-Каралева Вясна". Дзяўчына займаецца грамадскай і творчай дзейнасцю, не баіцца цяжкасцей і заўсёды гатова прыйсці на дапамогу. Яна мэтанакіраваная і не баіцца пакараць новыя вяршыні.
У Мінску вечарам 23 мая прайшоў нацыянальны фінал XXVI Міжнароднага міжвузаўскага конкурсу грацыі і артыстычнага майстэрства "Каралева Вясна - 2017". За права стаць лепшай змагаліся 15 канкурсантак. Дзяўчаты павінны былі выканаць розныя конкурсныя заданні, прадэманстраваўшы пры гэтым сцэнічную культуру, камунікабельнасць, веданне этыкету, пачуццё гумару, грацыю, артыстычнае майстэрства і знешнія даныя. Таксама яны прадэманстравалі свае веды ў інтэлектуальным конкурсе і праявілі артыстызм у творчых нумарах.
Дзяўчаты, якія занялі першае і другое месцы, прадставяць Беларусь у фінале міжнароднага міжвузаўскага конкурсу грацыі і артыстычнага майстэрства "Каралева Вясна - 2017", які пройдзе ў чэрвені ў Расіі.
Ідэйнымі натхняльнікамі праекта выступаюць Беларускі рэспубліканскі саюз моладзі і Расійскі саюз моладзі. Арганізатары беларускага фіналу - БРСМ, Міністэрства адукацыі, Нацыянальная школа прыгажосці. Галоўная місія - выяўленне і падтрымка таленавітай моладзі, прапаганда студэнцкай творчасці, захаванне культуры, традыцый і звычаяў народаў краін - удзельніц праекта. Аб'ядноўваючы на працягу больш як 20 гадоў самых прывабных і таленавітых студэнтак з Беларусі, Расіі, блізкага і далёкага замежжа, конкурс застаецца адным з самых цікавых і прэстыжных студэнцкіх спаборніцтваў міжнароднага фармату.-0-
