13 чэрвеня, Мінск /Кар. БЕЛТА/. Сёння абітурыенты здаюць цэнтралізаванае тэсціраванне па рускай мове. Гэта адно з самых масавых ЦТ, на яго зарэгістраваліся амаль 63 тыс., паведаміў карэспандэнту БЕЛТА дырэктар Рэспубліканскага інстытута кантролю ведаў Юрый Міксюк.
Нягледзячы на масавасць, у РІКВ не плануюць даваць асобых рэкамендацый наконт своечасовага прыбыцця на экзамен. Пачатак традыцыйна ў 11.00. Быць на месцы, як і на іншых ЦТ, лепш прыкладна за паўгадзіны. Юрый Міксюк адзначыў, што сістэма наладжана такім чынам, што пытанняў быць не павінна.
Пры сабе трэба мець пропуск, дакумент, які засведчвае асобу (пашпарт, пасведчанне на права жыхарства ў Беларусі, пасведчанне бежанца або даведку, якую выдае МУС у выпадку iх страты або крадзяжу). Акрамя таго, з сабой на тэсціраванне трэба ўзяць ручку (гелевую або капілярную) з чарніламі чорнага колеру.
Нельга прыносіць тэлефоны і іншыя ўстройствы, якія перадаюць, прымаюць і захоўваюць інфармацыю. Выключэнне зроблена толькі для калькулятара і толькі на ЦТ па фізіцы і хіміі. У час тэсціравання нельга мяняцца месцамі, экзаменацыйнымі матэрыяламі, прасіць аб дапамозе іншых людзей для выканання тэставых заданняў. Калі ў абітурыента ўзнікла пытанне, то ён можа звярнуцца да камісіі.
Наступнае ЦТ, па грамадазнаўстве, пройдзе 15 чэрвеня. Усяго на цэнтралізаванае тэсціраванне ў Беларусі зарэгістраваліся 76 тыс. 888 чалавек. Яны будуць здаваць 258,3 тыс. тэстаў па вучэбных прадметах.-0-
