1 сакавіка, Мінск /Кар. БЕЛТА/. На Адзіным партале электронных паслуг з 1 сакавіка актывуюцца тры адміністрацыйныя працэдуры Дзяржаўнага пагранічнага камітэта для фізічных і юрыдычных асоб, паведамляе БЕЛТА са спасылкай на АПЭП.
Для фізасоб гэта "Выдача пропускаў на ўезд (уваход), часовае знаходжанне і перамяшчэнне ў пагранічнай зоне замежным грамадзянам і асобам без грамадзянства, якія пастаянна пражываюць за межамі Рэспублікі Беларусь" і "Выдача пропускаў на ўезд (уваход), часовае знаходжанне і перамяшчэнне ў пагранічнай паласе".
Такім чынам, фізічныя асобы змогуць падаваць дакументы на афармленне пропуска ў пагранічную зону і пагранічную паласу не толькі ў папяровым выглядзе, але і ў электронным з дапамогай АПЭП, не выходзячы з дому.
Для юрыдычных асоб з'явіцца магчымасць падаваць хадайніцтва і спісы на атрыманне дазволу на ажыццяўленне гаспадарчай і іншай дзейнасці ў пагранічнай паласе.
Для афармлення пакета дакументаў неабходна ўвайсці ў асабісты кабінет на АПЭП, выбраць неабходную адміністрацыйную працэдуру і запоўніць неабходныя формы. Заява будзе разгледжана ва ўстаноўленыя тэрміны (5 рабочых дзён для фізічных асоб і 30 рабочых дзён для юрыдычных асоб). Пасля разгляду заявы на электронную пошту таго, хто звярнуўся, прыйдзе паведамленне аб гатоўнасці пропуска або аб адмове ў выдачы пропуска з пазначэннем прычыны.
Пропуск можна будзе забраць у падраздзяленні органаў пагранічнай службы, пазначаным у пададзенай электроннай заяве.-0-