1 сакавіка, Мінск /Міхаіл Маціеўскі - БЕЛТА/. Перамяшчэнне паміж Жыткавічамі і Туравам наладзяць у бліжэйшы час. Аб гэтым заявіў журналістам намеснік прэм'ер-міністра Міхаіл Русы па выніках даклада Прэзідэнту Беларусі Аляксандру Лукашэнку, перадае карэспандэнт БЕЛТА.
"Мы паглядзім у самы бліжэйшы час, каб была арганізавана работа па дастаўцы людзей на той бераг", - сказаў Міхаіл Русы.
Акрамя таго, неабходна наладзіць дастаўку грузаў паміж двума населенымі пунктамі. "Гэта зона ў нас прамысловая і плодаагароднінная. Аб'язджаць на трыста з нечым кіламетраў - гэта дрэнная лагістыка", - адзначыў віцэ-прэм'ер.
Ён пацвердзіў, што ў гэтым годзе мост будзе адназначна пабудаваны, ужо распрацаваны адпаведныя праекты. "Кіраўнік дзяржавы ўзяў гэта пад асабісты кантроль. Мне як выхадцу з Тураўшчыны даручана ўзяць гэта на асаблівы кантроль", - дадаў Міхаіл Русы.-0-
