21 снежня, Мінск /Алена Прус - БЕЛТА/. Павышэнне пенсійнага ўзросту дасць магчымасць не змяншаць пенсіі ва ўмовах старэння насельніцтва Беларусі. Аб гэтым заявіў намеснік міністра працы і сацыяльнай абароны Валерый Кавалькоў на анлайн-канферэнцыі, якая праходзіць на сайтах БЕЛТА і міністэрства.
Адказваючы на пытанне аб тым, які чакаецца асноўны вынік ад павышэння пенсійнага ўзросту, намеснік міністра адзначыў, што "гэта дасць магчымасць не змяншаць пенсіі ва ўмовах старэння насельніцтва".
Згодна з указам ад 11 красавіка 2016 года нумар 137 "Аб удасканаленні пенсійнага забеспячэння" з 2017 года агульнаўстаноўлены пенсійны ўзрост павышаецца штогод з 1 студзеня на 6 месяцаў да дасягнення ўзросту мужчынамі 63 гадоў, жанчынамі - 58 гадоў.
Такім чынам, з 1 студзеня 2017 года да 2022 года кожны год устанаўліваецца новы пенсійны ўзрост (для звароту за пенсіяй) шляхам яго павышэння адносна папярэдняга года на 6 месяцаў: у 2017 годзе для мужчын - 60 гадоў 6 месяцаў, для жанчын - 55 гадоў 6 месяцаў; у 2018 годзе для мужчын - 61 год, для жанчын - 56 гадоў; у 2019 годзе для мужчын - 61 год 6 месяцаў, для жанчын - 56 гадоў 6 месяцаў; у 2020 годзе для мужчын - 62 гады, для жанчын - 57 гадоў; у 2021 годзе для мужчын - 62 гады 6 месяцаў, для жанчын - 57 гадоў 6 месяцаў; з 2022 года для мужчын - 63 гады, для жанчын - 58 гадоў.
На анлайн-канферэнцыю паступіла пытанне аб тым, чаму падзяляюць год нараджэння на дзве палавіны, тым самым павялічваючы пенсійны ўзрост для народжаных у другім паўгоддзі на цэлы год, а не на шэсць месяцаў. Валерый Кавалькоў растлумачыў: "Ва ўказе няма норм, якія вызначаюць час выхаду на пенсію ў залежнасці ад даты нараджэння. Пенсія па ўзросце, як і раней, будзе назначацца пры ўмове дасягнення пенсійнага ўзросту, дзеючага ў год звароту. Што датычыцца тых, хто нарадзіўся ў другой палавіне года, то іх больш позні выхад на пенсію абумоўлены тым, што яны проста не паспяваюць дасягнуць новага пенсійнага ўзросту да канца года, у якім дзейнічае больш нізкі пенсійны ўзрост".-0-
