10 красавіка, Мінск /Кар. БЕЛТА/. Начальнік упраўлення рэгулявання нябанкаўскіх аперацый Нацыянальнага банка Дзмітрый Набздораў растлумачыў у прэс-цэнтры БЕЛТА механізм разліку выплат па лізінгу жылля.
"Разгледзім канкрэтную сітуацыю: кватэра каштуе Br100 тыс. Кліент выбірае, які памер авансу гатовы заплаціць, дамаўляецца з лізінгадаўцам (па заканадаўстве ён не можа перавышаць 40 працэнтаў. - Заўвага БЕЛТА). Дапусцім, гэта 20 працэнтаў, значыць, Br20 тыс. - гэта аванс. Адпаведна, за ўвесь тэрмін лізінгу лізінгаатрымальніку застанецца кампенсаваць Br80 тыс. кошту прадмету лізінгу. Калі тэрмін лізінгу складзе 20 гадоў, то Br80 тыс. дзеліцца на 240 месяцаў. Атрымліваецца лічба, якая з'яўляецца асноўнай сумай доўгу ў месяц (Br333). Працэнтная стаўка разлічваецца так: калі цяпер яна 14 працэнтаў (роўная стаўцы рэфінансавання з 19 красавіка 2017 года), то першы месяц без ануітэту на Br80 тыс. з 14 працэнтаў гадавых, гэта значыць 14 падзяліць на 1200 і памножыць на Br80 тыс. - атрымліваецца крыху больш за Br933 працэнтаў. Такім чынам, самы першы максімальны плацеж пасля авансу, калі здзелка без ануітэту, меншы за Br1300 (Br1266. - Заўвага БЕЛТА). Значыць, даход лізінгаатрымальніка павінен быць каля Br2600 (пры здзелцы без ануітэту). Калі мы гаворым пра здзелкі з ануітэтам, гэта значыць плацяжы будуць роўныя, то мы нават у галаве можам палічыць, што сума ў нашым прыкладзе складзе не менш за Br900 у месяц (Br995. - Заўвага БЕЛТА), але яна нязменная. Адпаведна, даход сям'і лізінгаатрымальніка павінен складаць не менш за Br1800", - такія даныя пры вусным падліку прывёў начальнік упраўлення. Пры неануітэтным графіку аплаты праводзяцца кожны месяц на адну і тую ж суму, пры зніжальным - спачатку, напрыклад, Br1300, Br1285 і гэтак далей з памяншэннем на працягу 20 гадоў.
Дзмітрый Набздораў адзначыў, што кожны чалавек можа выбраць той ці іншы варыянт. Па меры павелічэння авансу сума штомесячных плацяжоў змяншаецца. Аналагічна і пры павелічэнні выкупнога кошту штомесячныя плацяжы істотна зніжаюцца. Кліент для сябе выбірае, за якую цэну ён будзе выкупляць гэту кватэру - выкупны кошт можа быць мінімальны, але не большы за 25 працэнтаў ад кошту кватэры. "Калі апошні плацеж будзе дасягаць Br25 тыс., то ў нашым прыкладзе не Br80 тыс. трэба дзяліць на 240 месяцаў, а ад Br80 тыс. адняць Br25 тыс. і такім чынам вызначыць суму асноўнага доўгу", - дадаў ён.
У сваю чаргу, начальнік аддзела рэгулявання лізінгавай дзейнасці ўпраўлення рэгулявання нябанкаўскіх аперацый Нацыянальнага банка Аляксандр Дзядкоў растлумачыў, што лізінгавы плацеж умоўна складаецца з двух складнікаў - пагашэнне асноўнай сумы кошту прадмету лізінгу, які пры класічнай схеме выплачваецца роўнымі долямі, і працэнтная стаўка. Пры гэтым першыя некалькі гадоў можа ісці льготнае пагашэнне кантрактнага кошту аж да самай мінімальнай сумы або наогул адтэрміноўка выплаты толькі з аплатай працэнтаў. Усе гэтыя варыянты могуць разглядацца індывідуальна кожнай лізінгавай кампаніяй.
Як паведамлялася, 6 красавіка кіраўнік дзяржавы падпісаў указ нумар 109, які фарміруе прававыя ўмовы для прадастаўлення фізічным асобам у валоданне і карыстанне жылых дамоў і кватэр па дагаворах фінансавай арэнды (лізінгу). Дакумент уступіць у сілу праз шэсць месяцаў пасля яго афіцыйнага апублікавання. У адпаведнасці з указам лізінгаатрымальнікам жылога памяшкання з'яўляецца толькі фізічная асоба - грамадзянін Беларусі або асобы без грамадзянства, якія пастаянна пражываюць у рэспубліцы. Жылы дом або кватэра, атрыманыя ў часовае валоданне і карыстанне па дагаворы лізінгу, не могуць выкарыстоўвацца для прадпрымальніцкай дзейнасці. Да іх прымяняюцца тарыфы на жыллёва-камунальныя паслугі, устаноўленыя для насельніцтва.
За грамадзянінам, які заключыў дагавор лізінгу жылога памяшкання, захоўваецца права знаходзіцца на ўліку маючых патрэбу ў паляпшэнні жыллёвых умоў да пераходу да яго права ўласнасці на гэта жылое памяшканне.-0-
