11 снежня, Мінск /Кар. БЕЛТА/. Мінімальная заработная плата (МЗП) і грашовыя даходы насельніцтва Беларусі за лістапад не індэксуюцца, паведамілі карэспандэнту БЕЛТА ў Міністэрстве працы і сацыяльнай абароны.
Паводле інфармацыі Нацыянальнага статыстычнага камітэта, індэкс спажывецкіх цэн за лістапад да кастрычніка 2017 года склаў 100,5 працэнта. Такім чынам, індэкс спажывецкіх цэн за лістапад не перасягнуў пяціпрацэнтнага парога да студзеня 2017 года - месяца перагляду ўстаноўленых ад базавай велічыні дапамог па беспрацоўі і стыпендый грамадзянам у перыяд прафесійнай падрыхтоўкі, перападрыхтоўкі і павышэння кваліфікацыі па накіраванні органа па працы, занятасці і сацыяльнай абароне гарадскога, раённага выканаўчага камітэта; да верасня 2017 года - месяца перагляду грашовых даходаў (заработнай платы, дзяржаўных стыпендый навучэнцам, стыпендый клінічным ардынатарам, стыпендый работнікам, накіраваным на павышэнне кваліфікацыі, перападрыхтоўку, стажыроўку на вочнай (дзённай) форме навучання ў іншы населены пункт), што атрымліваюцца з бюджэтных крыніц; заработнай платы дзяржаўных служачых і прыраўнаваных да іх асоб; грашовага забеспячэння ваеннаслужачых, асоб радавога і начальніцкага складу; грашовага забеспячэння ваеннаслужачых тэрміновай ваеннай службы, сувораўцаў, выхаванцаў воінскіх часцей, курсантаў ваенных навучальных устаноў. У сувязі з гэтым такія віды даходаў за лістапад бягучага года не індэксуюцца.
Мінімальная заработная плата, устаноўленая ўрадам з 1 студзеня бягучага года ў памеры Br265, за лістапад таксама не індэксуецца. Насельніцтву, якое атрымлівае даходы на тэрыторыі рэспублікі з іншых крыніц, пакрыццё страт ад інфляцыі ажыццяўляецца па падставах, прадугледжаных калектыўнымі дагаворамі (пагадненнямі).
Для даведкі: грашовыя даходы насельніцтва за лістапад 2017 года, што падлягаюць індэксацыі ў парадку, устаноўленым заканадаўствам, індэксуюцца ў межах Br197,81 - 100 працэнтаў зацверджанага бюджэту пражытачнага мінімуму ў сярэднім на душу насельніцтва, дзеючага на момант індэксацыі (у адпаведнасці з указам ад 28 студзеня 2006 года нумар 55 "Аб нарматыве індэксацыі грашовых даходаў насельніцтва з улікам інфляцыі").-0-
