26 верасня, Мінск /Кар. БЕЛТА/. Міністэрства спорту і турызму пачало работу над падрыхтоўкай змяненняў у заканадаўства аб турызме, галоўнай мэтай карэкціровак будзе абарона правоў турыстаў. Аб гэтым паведаміў намеснік дырэктара Дэпартамента па турызме - начальнік аддзела планавання і арганізацыі турыстычнай дзейнасці Мінспорту Віталь Грыцэвіч сёння на круглым стале ў час выстаўкі "Турбізнес", перадае карэспандэнт БЕЛТА.
Паводле слоў прадстаўніка Мінспорту, змяненні ў заканадаўства наспелі ў тым ліку на фоне сітуацыі з ануляцыяй пуцёвак расійскай кампаніі "Наталі Турс" і выпадкаў невыканання абавязацельстваў перад турыстамі, якія куплялі пуцёўкі з вылетам з Украіны.
У прыватнасці, прапануецца ўвесці дакладнае азначэнне, хто з'яўляецца тураператарам і хто такі турагент, і, адпаведна, размежаваць іх адказнасць перад кліентамі. Такім чынам, турагент не будзе несці адказнасць замест тураператара. "На нашу думку, калі атэль або авіяперавозчык не аказаў паслугу, то за гэта павінен адказваць тураператар, які фарміруе турпакет, а не турагент", - растлумачыў Віталь Грыцэвіч.
Адна з прапаноў - увесці інстытут фінансавай адказнасці тураператара. У якім выглядзе гэты інстытут будзе працаваць - тэма для дыскусій, сказаў Віталь Грыцэвіч. Прапрацоўваюцца розныя варыянты, у тым ліку стварэнне так званых гарантыйных фондаў, страхаванне адказнасці тураператара.
У законе таксама прапануецца прапісаць, што замежным туркампаніям нельга будзе весці дзейнасць у Беларусі, не зарэгістраваўшы тут сваю юрыдычную асобу.
Змяненні прадугледжаны і для рэестра суб'ектаў турыстычнай дзейнасці, які можа стаць механізмам дадатковай абароны правоў турыстаў, а не проста даведнікам турфірм. Абмяркоўваецца варыянт, што нядобрасумленныя турфірмы, якія груба парушаюць заканадаўства, будуць выключаць з рэестра. Падставай для выключэння маглі б стаць прыпыненне дзейнасці або яе неажыццяўленне кампаніяй на працягу трох месяцаў.
Змяненні могуць закрануць і работу экскурсаводаў, каб абараніць гэты рынак ад нядобрасумленнай канкурэнцыі з боку неатэставаных гідаў, у тым ліку тых, якія прыязджаюць з-за мяжы. Адна з прапаноў турбізнесу - дазволіць экскурсаводам працаваць па прынцыпе аграсядзіб, выплачваючы адну базавую велічыню ў год.
Прадугледжваецца, што новая рэдакцыя закона "Аб турызме" будзе распрацавана ў 2019 годзе.-0-
