24 мая, Мінск /Кар. БЕЛТА/. Міністэрства аховы здароўя распрацавала праекты дзвюх пастаноў, у якіх вызначаны стымулюючыя надбаўкі і кампенсуючыя даплаты работнікам аховы здароўя, іх памеры. Такая інфармацыя размешчана ў выданні "Медицинский вестник", паведамляе БЕЛТА.
Новая сістэма аплаты працы распрацоўваецца ў мэтах выканання ўказа нумар 27 ад 18 студзеня 2019 года "Аб аплаце працы работнікаў бюджэтных арганізацый" і ўступіць у сілу з 1 студзеня 2020 года. На пасяджэнні грамадскага савета ў Мінску абмяркоўваліся праекты пастаноў Міністэрства аховы здароўя, у якіх вызначаны выплаты, іх памеры, разлічаныя з улікам максімальнага захавання ў грашовым эквіваленце па дзеючых умовах і з 1 студзеня 2020 года.
"Мы не павінны прапусціць ні адну катэгорыю медыцынскіх работнікаў, узровень аплаты працы не павінен стаць меншым, - адзначыў міністр аховы здароўя Валерый Малашка. - Задача, якая стаяла перад распрацоўшчыкамі, - спрасціць сістэму, узяць на сябе ўсю адказнасць за рэсурсы, якія мы маем, іх рацыянальнае і справядлівае выкарыстанне".
Члены рабочай групы адзначылі, што дзеючымі ўмовамі аплаты працы ў ахове здароўя прадугледжана больш за 50 выплат (павышэнні, надбаўкі і даплаты). Прапануецца аптымізаваць колькасць выплат да 12 (8 стымулюючых надбавак і 4 кампенсуючыя даплаты) за кошт аб'яднання дзеючых падстаў.
Першы праект будзе распаўсюджвацца на ўсіх медыцынскіх і фармацэўтычных работнікаў бюджэтных арганізацый незалежна ад ведамаснай падпарадкаванасці. Стымулюючыя надбаўкі ў працэнтах ад акладу работніка будуць згодна з праектам за прымяненне (удзел у прымяненні) новых, складаных і ўнікальных метадаў аказання меддапамогі (уводзіцца з 1 студзеня 2020 года ўказам нумар 27, які адмяняе ўказ нумар 619 ад 26 снежня 2005 года); наяўнасць кваліфікацыйнай катэгорыі; выкананне кіраўнікамі (іх намеснікамі) арганізацый дадатковага аб'ёму ўрачэбнай нагрузкі. Надбаўкі прызначаны таксама за спецыфіку працы па розных падставах, у залежнасці ад выконваемай работы і пасады (напрыклад для медработнікаў, якія аказваюць меддапамогу ў амбулаторных умовах; аказваюць хуткую меддапамогу; урачоў-спецыялістаў хірургічнага профілю, урачоў-інтэрнаў (правізараў-інтэрнаў); урачоў-экспертаў МРЭК; медработнікаў, якія ажыццяўляюць дзяжурства дома). Кампенсуючыя даплаты ў працэнтах ад базавай стаўкі (Br180) прадугледжаны за выкананне функцыі пазаштатнага галоўнага спецыяліста; кіраўнікам адасобленых структурных падраздзяленняў, урачам-спецыялістам (кіраўнікам структурных падраздзяленняў), загадчыкам ФАПаў, здраўпунктаў, прафдэзаддзелаў, сярэднім медработнікам (старшым).
Другі праект распаўсюджваецца на работнікаў, у тым ліку адміністрацыйна-кіраўніцкіх і гаспадарча-абслуговых, бюджэтных арганізацый сістэмы Міністэрства аховы здароўя. Згодна з ім стымулюючыя надбаўкі ў працэнтах ад акладу прадугледжаны маладым спецыялістам; за ўзровень кваліфікацыі немедыцынскім работнікам (аналагічна як для медыцынскіх і фармацэўтычных работнікаў за наяўнасць кваліфікацыйнай катэгорыі); за напружанасць і характар работы, а таксама інжынерам, якія працуюць з асабліва складанай медапаратурай, медыцынскім фізікам, хімікам, біёлагам, спецыялістам з вышэйшай немедыцынскай адукацыяй. Кампенсуючыя даплаты ад базавай стаўкі (Br180) прызначаны за работу ў арганізацыях (структурных падраздзяленнях), размешчаных у вясковай мясцовасці; за асаблівы характар працы (па аналогіі з дзеючым павышэннем тарыфных акладаў работнікаў за работу ў шкодных умовах працы).-0-
