23 сакавіка, Мінск /Юлія Огнева - БЕЛТА/. У Беларусі распрацоўваецца праект указа аб пераходзе на адраснае субсідзіраванне будаўніцтва жылля з дзяржаўнай падтрымкай, паведамілі карэспандэнту БЕЛТА ў Міністэрстве архітэктуры і будаўніцтва.
"Сістэма прамых ільготных крэдытаў праз пералічэнне сродкаў банкамі паступова будзе заменена сістэмай субсідзіравання не банкаў, а непасрэдна грамадзян. Аб'ёмы прамой дзяржпадтрымкі ў выглядзе льготных крэдытаў апошнім часам скарачаюцца. Акрамя таго, Беларусь стараецца кіравацца рэкамендацыямі міжнародных арганізацый аб тым, што рэсурснай базы дырэктыўнага крэдытавання не павінна быць. Таму цяпер і распрацоўваем праект указа аб пераходзе на адраснае субсідзіраванне", - адзначылі ў міністэрстве.
Сутнасць прапануемых навацый у тым, што грамадзянін зможа атрымаць субсідыю, якую затым зрасходуе на пагашэнне крэдыту, атрыманага на камерцыйных умовах. "Сістэма будзе працаваць так: камерцыйныя банкі прапануюць крэдытаатрымальнікам пазыковыя сродкі пад будаўніцтва жылля, а грамадзяніну будзе налічвацца субсідыя. Для некаторых катэгорый яна пойдзе на пагашэнне часткі працэнтаў і часткі асноўнага доўгу па крэдыце, - канстатавалі ў ведамстве. - Гэта дасць магчымасць нам, па-першае, прыцягнуць у будаўніцтва жылля з дзяржпадтрымкай дадатковыя рэсурсы, якія ў камерцыйных банкаў ёсць. А па-другое, пазбягаць дырэктыўнага крэдытавання, гэта значыць адыходзіць ад прамога пералічэння банкам сродкаў з бюджэту".
Мяркуецца, што працэнтныя стаўкі ў асноўным не зменяцца, а памеры субсідый будуць разлічвацца такім чынам, каб у грамадзян заставаліся прыблізна тыя ж аб'ёмы плацяжоў, што і раней. Пры гэтым застаецца дзейнічаць і ўказ нумар 13 "Аб некаторых пытаннях прадастаўлення грамадзянам дзяржаўнай падтрымкі пры будаўніцтве (рэканструкцыі) або набыцці жылых памяшканняў". "Праект новага ўказа цяпер знаходзіцца ў рабоце. Ён прадстаўлены ў Савет Міністраў. Работа над дакументам набліжаецца да завяршэння", - падкрэслілі ў Мінбудархітэктуры.
Апошнія навацыі, якія прыўнясе рыхтуемы дакумент, павінны заахвоціць беларускія банкі больш актыўна далучацца да працэсу субсідзіравання. "У Беларусі цяпер каля 30 банкаў, з іх 15 крэдытуюць жыллёвае будаўніцтва, з якіх толькі 2 - жыллё з дзяржпадтрымкай. Мы разлічваем, што далей не менш як 10-15 банкаў будуць выдаваць крэдыты на будаўніцтва жылля з дзяржпадтрымкай. Дзяржава ў гэтым выпадку возьме на сябе задачу выплачваць грамадзянам розніцу ў працэнтах - паміж ільготнымі і камерцыйнымі крэдытамі", - растлумачылі ў міністэрстве.-0-
