18 верасня, Мінск /Кар. БЕЛТА/. Міністр адукацыі Ігар Карпенка сёння на сустрэчы з членамі грамадскага рэспубліканскага студэнцкага савета і маладзёжнымі пасламі Мэт устойлівага развіцця прапанаваў моладзі актыўней далучацца да фарміравання гуманітарнага блока прадметаў у ВНУ, выказаць ідэі па яго напаўненні, перадае карэспандэнт БЕЛТА.
Ігар Карпенка заклікаў маладых людзей прыняць актыўны ўдзел у абмеркаванні пытанняў зместу вышэйшай адукацыі. Ён расказаў, што рабочая група ў складзе вучоных, метадыстаў падрыхтавала канцэпцыю, якую мае намер абмеркаваць з кіраўнікамі кафедр грамадскіх навук ВНУ. "На наш погляд, павінна быць дзве дысцыпліны адукацыйнага дзяржаўнага кампанента - філасофія і гісторыя беларускай дзяржаўнасці", - выклаў сутнасць канцэпцыі міністр.
Ён растлумачыў, што спецыяльны курс па гісторыі беларускай дзяржаўнасці не будзе дубліравацца са школьным, у ім будуць глыбей закранацца пытанні фарміравання суверэннай Беларусі, яе грамадска-палітычнай сістэмы, эканамічнай мадэлі і г.д. Усяго ў пералік дысцыплін сацыяльна-гуманітарнага блока плануецца ўключыць 20 прадметаў, у тым ліку паліталогію, рэлігіязнаўства, эканамічную тэорыю, сацыялогію і іншыя.
Фарміраванне сацыяльна-гуманітарнага блока дысцыплін у ВНУ прадаўжаецца, у гэтым працэсе прымаюць удзел у тым ліку вучоныя і студэнцкія саветы ВНУ.
Грамадскі студсавет сабраўся ў рэспубліканскім маладзёжным цэнтры. Маладыя людзі разам з прадстаўнікамі Мінадукацыі, інстытута вышэйшай школы разгледзелі і ўнеслі прапановы ў праект стратэгіі развіцця дзяржаўнай маладзёжнай палітыкі Беларусі да 2030 года, абмеркавалі правядзенне нацыянальнага маладзёжнага студэнцкага форуму ў 2019 годзе, механізмы палучэння моладзі да дзейнасці па рэалізацыі нацыянальнай стратэгіі па дасягненні МУР.-0-