15 сакавіка, Мінск /Кар. БЕЛТА/. Канстытуцыйнае права чалавека на працу павінна быць рэалізавана максімальна поўна і якасна. Такое меркаванне выказаў старшыня Федэрацыі прафсаюзаў Беларусі Міхаіл Орда, паведамілі БЕЛТА ў прэс-службе ФПБ.
"У чалавека павінна быць работа. Гэта права замацавана ў Канстытуцыі. Пры гэтым праца разглядаецца не проста як працэс або як сродак да існавання, а як найбольш дастойны спосаб развіцця і самасцвярджэння чалавека", - сказаў Міхаіл Орда.
25 гадоў Канстытуцыі Беларусі - вельмі значная і важная дата для ўсяго беларускага грамадства, адзначыў старшыня нацыянальнага прафцэнтра. Асноўны Закон замацоўвае працэсы фарміравання незалежнай Беларусі як сацыяльнай дзяржавы, мэты і перспектывы развіцця на будучае. Сёння менавіта гэты галоўны канстытуцыйны тэзіс аб сацыяльнай сутнасці дзяржавы пакладзены ў аснову праводзімай палітыкі.
У сувязі з гэтым Міхаіл Орда ў першую чаргу ўказаў на падтрымку найбольш слабаабароненых катэгорый, шлях паступовых змен у эканоміцы, а не шокавых рэформ. "Гісторыя ведае шмат прыкладаў, калі прыгожая тэорыя пра рэзкія пераўтварэнні ў эканоміцы прыводзіла да калапсу і разрухі. Пры шокавых рэформах перш за ўсё церпяць людзі: гэта звальненні, беспрацоўе, закрыццё прадпрыемстваў, якія гадамі стваралі многія пакаленні. Пайсці па такім шляху - значыць перакрэсліць працу і дасягненні дзесяцігоддзяў. І самае галоўнае - пакінуць нашых дзяцей без стабільнасці і з вельмі цьмянымі перспектывамі развіцця, - сказаў ён. - Таму, безумоўна, прафсаюзы падтрымліваюць палітыку па захаванні працоўных калектываў і правядзенні сацыяльна адказнай аптымізацыі там, дзе гэта неабходна".
Старшыня нацыянальнага прафцэнтра дадаў, што на працягу ўсёй гісторыі незалежнасці дзяржавы Федэрацыя прафсаюзаў працуе над тым, каб права чалавека на працу было рэалізавана максімальна поўна і якасна. "Гэта работа тэхнічнай інспекцыі працы прафсаюзаў, накіраваная на стварэнне дастойных і бяспечных умоў працы - каб чалавек працаваў у камфортнай абстаноўцы і вяртаўся з работы здаровым. Гэта прававая прафсаюзная служба, якая павінна абараняць працоўныя правы людзей. Таксама гэта калектыўна-дагаворная работа на прадпрыемствах і арганізацыях, накіраваная на тое, каб замацаванае ў Канстытуцыі права чалавека на справядлівую ўзнагароду за працу было рэалізавана на практыцы", - сказаў ён. Галоўная мэта любога пагаднення, калектыўнага дагавора - устанаўленне справядлівых і абавязковых да выканання правіл у сферы занятасці, аплацы працы і іншых відаў падтрымкі работнікаў.-0-
