21 сакавіка, Мінск /Кар. БЕЛТА/. Пастановай Савета Міністраў ад 21 сакавіка 2018 года нумар 208 унесены змяненні і дапаўненні ў стратэгію Беларусі ў сферы інтэлектуальнай уласнасці на 2012-2020 гады, у тым ліку дапоўнены пералік першачарговых мерапрыемстваў на 2018-2020 гады, паведамілі БЕЛТА ў прэс-службе беларускага ўрада.
Гэты комплекс мерапрыемстваў накіраваны на развіццё нацыянальнай сістэмы інтэлектуальнай уласнасці, удасканаленне механізмаў аховы, абароны і кіравання аб'ектамі інтэлектуальнай уласнасці і ўключае 29 мерапрыемстваў па напрамках: развіццё заканадаўчага рэгулявання ў гэтай сферы, развіццё інфраструктуры сістэмы інтэлектуальнай уласнасці, развіццё сістэмы кіравання інтэлектуальнай уласнасцю, задачы ўстойлівага развіцця і стандарты аховы інтэлектуальнай уласнасці, процідзеянне парушэнням у гэтай сферы, развіццё патэнтна-інфармацыйнага і навукова-метадычнага забеспячэння адукацыі ў сферы інтэлектуальнай уласнасці.
Сярод першачарговых мерапрыемстваў на 2018-2020 гады - разгляд пытанняў аб удзеле Беларусі ў Гаагскім пагадненні аб міжнароднай рэгістрацыі прамысловых узораў ад 6 лістапада 1925 года і аб кадыфікацыі заканадаўства ў сферы інтэлектуальнай уласнасці, падрыхтоўка праекта закона "Аб унясенні змяненняў і дапаўненняў у Закон Рэспублікі Беларусь "Аб геаграфічных указаннях", удасканаленне заканадаўства Беларусі па пытанні парадку вызначэння ацэнкі ўрону ад парушэння правоў на аб'екты інтэлектуальнай уласнасці, забеспячэнне правядзення грамадскага абмеркавання праектаў нарматыўных прававых актаў у гэтай сферы.
Таксама асаблівая ўвага ўдзелена развіццю сістэмы адукацыі ў гэтай сферы, правядзенню канферэнцый і семінараў па актуальных пытаннях прававой аховы і выкарыстання аб'ектаў інтэлектуальнай уласнасці. Прадугледжваецца арганізацыя школы брэнд-менеджменту, развіццё стартап-школ пры ўстановах вышэйшай адукацыі.-0-
