17 жніўня, Мінск /Кар. БЕЛТА/. Перад пачаткам 2017/2018 навучальнага года супрацоўнікі Дзяржаўтаінспекцыі праверылі аўтамабільныя дарогі і вуліцы, прылеглыя да дзіцячых устаноў адукацыі, паведаміла БЕЛТА старшы інспектар па асаблівых даручэннях УДАІ МУС Беларусі Ганна Банадык.
Прааналізаваны стан праезнай часткі, тратуараў і пешаходных дарожак, знадворнага асвятлення, тэхнічных сродкаў арганізацыі дарожнага руху.
Асаблівая ўвага ўдзелена наяўнасці і стану дарожных знакаў, разметкі, у тым ліку "Школа" і адлюстравання на праезнай частцы дарожнага знака "Дзеці", арганізацыі пешаходнага доступу на тэрыторыю школ, што выключае магчымасць нечаканага выхаду дзяцей на праезную частку. Правяралася наяўнасць і стан агароджы тэрыторыі, зачыняльных устройстваў і шлагбаумаў, тратуараў і пешаходных дарожак паблізу ўстаноў адукацыі, знадворнага асвятлення па асноўных напрамках руху дзяцей-пешаходаў, а таксама ўладкаванне штучных няроўнасцей на ўчастках паблізу ўстаноў адукацыі.
У выніку на ўстараненне выяўленых недахопаў уладальнікам дарог выдадзена 738 прадпісанняў. У органы мясцовай улады накіравана 222 інфармацыйныя запіскі аб існуючых праблемных пытаннях. У асобных выпадках за існуючыя дэфекты і недахопы вулічна-дарожнай сеткі службовыя асобы дарожных і камунальных арганізацый прыцягнуты да адміністрацыйнай адказнасці.
Не засталіся без увагі арганізацыі, якія займаюцца падвозам вучняў да навучальных устаноў. Праводзяцца праверкі тэхнічнага стану школьных аўтобусаў, маршрутаў, інструктажы вадзіцеляў аб асаблівасцях выканання патрабаванняў пры перавозках груп дзяцей аўтобусамі, а таксама мерах перасцярогі, што гарантуюць бяспеку па маршрутах.
Для прафілактыкі ДТЗ з удзелам непаўналетніх з 25 жніўня па 5 верасня на тэрыторыі рэспублікі запланавана спецыяльнае комплекснае мерапрыемства "Увага - дзеці!". Супрацоўнікі ДАІ ва ўзаемадзеянні з іншымі службамі органаў унутраных спраў сканцэнтруюць асноўныя намаганні на правядзенні прафілактычнай работы сярод дзяцей і бацькоў, вадзіцеляў транспартных сродкаў. У час акцыі месцы нясення службы нарадамі ДПС ДАІ будуць набліжаны да ўстаноў адукацыі.
Запланаваны ўдзел кіраўніцтва і супрацоўнікаў органаў унутраных спраў у жнівеньскіх педагагічных канферэнцыях, дзе асаблівая ўвага будзе ўдзелена пытанням арганізацыі ва ўстановах адукацыі работы па папярэджанні дзіцячага дарожна-транспартнага траўматызму, падрыхтоўцы пашпартоў бяспекі, абавязковым забеспячэнні вучняў святловяртальнымі элементамі і інш.-0-
