31 ліпеня, Мінск /Кар. БЕЛТА/. Беларусы змогуць шырэй удзельнічаць у распрацоўцы заканадаўства. Гэта прадугледжана законам "Аб нарматыўных прававых актах", які афіцыйна апублікаваны сёння на Нацыянальным прававым інтэрнэт-партале, паведамляе БЕЛТА.
У новым законе прадугледжаны механізмы, накіраваныя на пашырэнне ўдзелу грамадзян і юрыдычных асоб у нарматворчым працэсе, растлумачылі ў Нацыянальным цэнтры прававой інфармацыі. "У заканадаўстве замацаваны інстытуты публічнага абмеркавання, прагназавання вынікаў прыняцця нарматыўных прававых актаў (у тым ліку для прадпрымальніцкай дзейнасці) і прававога маніторынгу, - адзначылі ў цэнтры. - Арганізатар публічнага абмеркавання можа вынесці праект нарматыўнага прававога акта на публічнае (грамадскае або прафесійнае) абмеркаванне на прававым форуме Беларусі, а таксама шляхам парламенцкіх слуханняў, у СМІ". Інфармацыя аб правядзенні публічнага абмеркавання размяшчаецца на Нацыянальным прававым інтэрнэт-партале і ў прэсе, а таксама на інфармацыйных інтэрнэт-рэсурсах, якія выступаюць арганізатарамі публічнага абмеркавання, на афіцыйных сайтах дзяржаўных органаў.
Праекты нарматыўных прававых актаў будуць падпадаць пад абавязковую юрыдычную экспертызу на прадмет адпаведнасці міжнародным дагаворам і іншым міжнародным прававым актам, у тым ліку патрабаванням уніфікацыі і гарманізацыі заканадаўства ў інтэграцыйных аб'яднаннях, у якіх удзельнічае Беларусь. Прадугледжана навуковае суправаджэнне нарматворчай дзейнасці, прыцягненне вучоных да распрацоўкі праектаў актаў, пры правядзенні экспертыз. Вызначаны падыходы па рэалізацыі пакетнага прынцыпу падрыхтоўкі праектаў актаў, што дасць магчымасць забяспечваць сістэмнае і комплекснае прававое рэгуляванне адпаведных сфер грамадскіх адносін.
У законе таксама ўстаноўлена патрабаванне аб адпаведнасці прымаемых нарматыўных прававых актаў Мэтам устойлівага развіцця. Такая інфармацыя павінна быць уключана ў абгрунтаванне неабходнасці прыняцця дакумента. Ёсць і іншыя навацыі, накіраваныя на павышэнне якасці заканадаўства і эфектыўнасці ўзаемадзеяння ўсіх удзельнікаў нарматворчага працэсу ў Беларусі. "У цэлым можна канстатаваць, што новы закон унёс у нарматворчы працэс прадыктаваныя часам карэктывы, якія дадуць магчымасць яго значна абнавіць і аптымізаваць", - рэзюмавалі ў НЦПІ.-0-
