3 жніўня, Мінск /Кар. БЕЛТА/. Па выніках трох этапаў конкурсу спецыялістаў службовага сабакаводства "Верны сябар" Армейскіх міжнародных гульняў беларуская каманда ваенных кінолагаў знаходзіцца на трэцім месцы, паведамілі БЕЛТА ў прэс-службе Міністэрства абароны.
"Па выніках трох этапаў беларуская каманда знаходзіцца на трэцім месцы, уступаючы калегам з Расіі і Кітая. Канчатковую расстаноўку сіл вызначыць заключны этап конкурсу - "Эстафета. Дог-біятлон", - праінфармавалі ў ваенным ведамстве.
Малодшы сяржант тэрміновай службы Яўген Шатраўка, які заняў першае месца ў асабістым заліку на першым этапе конкурсу, у трэцім этапе стаў трэцім у асабістым заліку. Другое месца таксама ў беларуса - прапаршчыка Аляксандра Давыдава.
Конкурс службовага сабакаводства "Верны сябар" праходзіць у горадзе Дзмітраў (Расія). У ім прымаюць удзел зборныя кінолагаў з узброеных сіл сямі дзяржаў: Беларусі, Расіі, Кітая, Ірана, Егіпта, Алжыра, Узбекістана. У складзе 8 каманд сваё майстэрства дэманструюць 30 кіналагічных разлікаў. Конкурс прадоўжыцца да 5 жніўня.
Армейскія міжнародныя гульні праходзяць з 28 ліпеня па 11 жніўня на тэрыторыі сямі дзяржаў. Усяго ў рамках АрМГ-2018. праводзіцца 28 конкурсаў, удзел у якіх прымаюць прадстаўнікі 33 краін. Беларускія ваенаслужачыя прымаюць удзел у 16 конкурсах, упершыню - у конкурсах "Упэўнены прыём", "Сакалінае паляванне" і "Сувораўскі націск". На тэрыторыі Беларусі каманды з 18 дзяржаў удзельнічаюць у конкурсе "Снайперскі рубеж", які праходзіць на палігоне 38-й асобнай гвардзейскай дэсантна-штурмавой брыгады сіл спецыяльных аперацый Узброеных Сіл пад Брэстам.-0-
