18 студзеня, Мінск /Кар. БЕЛТА/. Беларусь і Егіпет падпісалі дагавор аб узаемнай прававой дапамозе па грамадзянскіх і эканамічных справах, паведаміла БЕЛТА прэс-сакратар Мінюста Вольга Мурашкоўская.
Заключэнне дагавора аб прававой дапамозе дасць магчымасць кампетэнтным органам абедзвюх дзяржаў вырашаць пытанні аказання прававой дапамогі па грамадзянскіх і эканамічных справах шляхам выканання даручэнняў аб вядзенні працэсуальных дзеянняў (у прыватнасці, перадача і ўручэнне дакументаў, атрыманне доказаў).
Бакі таксама падпісалі дагавор аб выдачы. Палажэнні дакумента створаць прававую аснову для ўзаемадзеяння кампетэнтных органаў у сферы выдачы злачынцаў. У адпаведнасці з дагаворам краіны абавязуюцца па просьбе выдаваць адзін аднаму асоб, якія знаходзяцца на іх тэрыторыях, для прыцягнення да крымінальнай адказнасці або для прывядзення прыгавору ў выкананне.
Міжнародныя дагаворы ў прававой сферы падпісаны ў ходзе афіцыйнага візіту Прэзідэнта Беларусі Аляксандра Лукашэнкі ў Егіпет.
Фарміраванне міжнароднай дагаворна-прававой базы ў сферы юстыцыі з Егіптам пачалося ў 2010 годзе з падпісання ў Мінску дагавора аб узаемнай прававой дапамозе па крымінальных справах. Такім чынам, цяпер паміж Беларуссю і Егіптам дагаворна-прававая база ў сферы прававой дапамогі сфарміравана поўнасцю.
Згодна з палажэннямі дагавораў, для іх уступлення ў сілу неабходна ратыфікацыя, ажыццяўленне як Беларуссю, так і Егіптам пэўных унутрыдзяржаўных працэдур па прызнанні абавязковай сілы гэтых дакументаў.-0-
