20 красавіка, Астравец /Кар. БЕЛТА/. АЭС, якая будуецца ў Астраўцы, закрые патрэбнасці Беларусі ў электраэнергіі на 30 працэнтаў, паведаміў сёння журналістам намеснік міністра энергетыкі Міхаіл Міхадзюк, перадае карэспандэнт БЕЛТА.
"Пасля запуску двух энергаблокаў АЭС закрые крыху больш за 30 працэнтаў патрэбнасці краіны", - праінфармаваў Міхаіл Міхадзюк.
Што датычыцца магчымага экспарту электраэнергіі з АЭС, то намеснік міністра адзначыў, што Беларусь і цяпер гатова прадаваць і прадае электраэнергію. Пры гэтым БелАЭС будуецца ў першую чаргу для ўласных патрэб, павышэння канкурэнтаздольнасці нацыянальнай эканомікі. "Будзем канкурэнтаздольныя - будуць у нас пакупнікі. На рынку электраэнергіі важна быць канкурэнтаздольным, паколькі для спажыўца важны ў першую чаргу кошт. Цяпер мы прадаём электраэнергію ў тым ліку Літве", - дадаў ён.
Беларуская АЭС - праект па будаўніцтве атамнай электрастанцыі новага пакалення "тры плюс" з двума энергаблокамі ВВЭР-1200 МВт, які рэалізуецца за 18 км ад Астраўца (Гродзенская вобласць). Першы энергаблок плануецца ўвесці ў эксплуатацыю ў 2019 годзе, другі - у 2020-м.-0-
