8 мая, Мінск /Уладзімір Мацвееў - БЕЛТА/. Прэзідэнт Беларусі Аляксандр Лукашэнка заявіў аб недапушчальнасці паслаблення адказнасці адносна распаўсюджвальнікаў наркотыкаў. Аб гэтым па выніках сустрэчы з кіраўніком дзяржавы расказаў журналістам старшыня Вярхоўнага суда Валянцін Сукала, перадае карэспандэнт БЕЛТА.
"Абгаворваліся пытанні далейшай барацьбы з наркаманіяй і злачынствамі, звязанымі з наркотыкамі. Кіраўнік дзяржавы адзначыў, што паслаблення адносна збытчыкаў і распаўсюджвальнікаў наркотыкаў быць ніякага не можа. Адносна спажыўцоў магчымы нейкія паслабленні і паблажкі, - сказаў старшыня Вярхоўнага суда. - А што датычыцца той формы, якая сёння выбрана групай маці, то гэта з'яўляецца недапушчальным, гэта націск і ўмяшанне ў правасуддзе. І гэта не той спосаб, які павінен быць у нас".
Валянцін Сукала адзначыў, што існуе законны парадак разгляду і вырашэння пытанняў па кожнай канкрэтнай скарзе. Пры гэтым ён канстатаваў, што з ліку маці асуджаных, якія аб'явілі галадоўку, у Вярхоўны суд звярталіся толькі шэсць. "Прычым скаргі дзвюх, як мне здаецца, былі задаволены. Пакаранне было зніжана. Таму ёсць законны спосаб звароту ў Вярхоўны суд з нагляднымі скаргамі па кожным канкрэтным выпадку. Але якога-небудзь паслаблення ўсеагульнага, асабліва для распаўсюджвальнікаў, як заявіў кіраўнік дзяржавы, не прадугледжваецца", - сказаў старшыня Вярхоўнага суда.
Адказваючы на пытанне аб плануемым абмеркаванні ў парламенце змяненняў у антынаркатычнае заканадаўства, Валянцін Сукала сказаў: "Размова ішла менавіта аб гэтым. Каб у тым праекце, які будзе, прадугледзець нейкае магчымае паслабленне толькі адносна спажыўцоў".
Старшыня Вярхоўнага суда таксама звярнуў увагу на той факт, што і ў цяпер дзеючым заканадаўстве для спажыўцоў наркотыкаў прадугледжаны альтэрнатыўныя меры пакарання, не звязаныя з пазбаўленнем волі. Так, санкцыя ч.1 арт.328 Крымінальнага кодэкса за незаконныя без мэты збыту выраб, перапрацоўку, набыццё, захоўванне, перавозку або перасылку наркатычных сродкаў, псіхатропных рэчываў або іх прэкурсораў ці аналагаў прадугледжвае пакаранне ў выглядзе абмежавання волі на тэрмін да пяці гадоў або пазбаўлення волі на тэрмін ад двух да пяці гадоў. "Там пазбаўленне волі назначаецца толькі ў адносінах да 30 працэнтаў асоб. Дзе раней судзімыя, магчыма, нейкія асацыяльныя асобы. А ў адносінах да астатніх назначаецца пакаранне, не звязанае з пазбаўленнем волі. Таму ў прынцыпе для спажыўцоў практыка назначэння пакаранняў з'яўляецца вытрыманай", - лічыць Валянцін Сукала.
"Што датычыцца пакаранняў для распаўсюджвальнікаў, збытчыкаў, вытворцаў наркотыкаў, то, вядома, там санкцыі суровыя, але суддзі выконваюць свой абавязак. Яны працуюць у рамках таго закону, які ёсць. Яны не маюць права карэкціраваць закон. І яны ад імя дзяржавы выносяць менавіта тыя пакаранні, якія прадугледжаны ў законе", - дадаў ён.-0-
