Поўная версія

Лукашэнка: упершыню з сярэдзіны мінулага стагоддзя свет знаходзіцца за крок ад глабальнага процістаяння

Прэзідэнт 13.02.2018 | 12:11

13 лютага, Мінск /Міхаіл Маціеўскі - БЕЛТА/. Упершыню з сярэдзіны мінулага стагоддзя свет знаходзіцца за крок ад узнікнення глабальнага процістаяння з самымі непрадказальнымі наступствамі. Аб гэтым Прэзідэнт Беларусі Аляксандр Лукашэнка заявіў сёння на пасяджэнні Савета бяспекі Рэспублікі Беларусь, перадае карэспандэнт БЕЛТА.

"Упершыню з сярэдзіны мінулага стагоддзя свет знаходзіцца за крок ад узнікнення глабальнага процістаяння з самымі непрадказальнымі наступствамі. Нас вельмі непакояць спекуляцыі некаторых краін на тэму ядзернай зброі, мілітарызацыя Усходне-Еўрапейскага рэгіёна, а таксама беспрэцэдэнтнае нарошчванне ваеннага патэнцыялу нашых краін-суседзяў. Гэта датычыцца як павелічэння колькасці іх узброеных сіл, так і расходаў на абарону", - звярнуў увагу Аляксандр Лукашэнка.

"Ужо даўно мы не сустракалі новы год з такім трывожным настроем, - сказаў Прэзідэнт. - Справа ў тым, што свет не стаў больш бяспечным. Наадварот, мы назіраем пашырэнне геаграфіі і маштабаў сутыкненняў інтарэсаў цэнтраў сілы. Гэта абумоўлівае практычна пастаяннае ўзрастанне нестабільнасці".

На нарадзе разглядаюцца ключавыя пытанні нацыянальнай бяспекі, плануецца ацаніць работу адпаведных дзяржаўных органаў у мінулым годзе і намеціць задачы на бліжэйшую перспектыву. "Для прыняцця неабходных рашэнняў мною дадзена ўказанне правесці гэта мерапрыемства ў фармаце пасяджэння Савета бяспекі. Гэта перш за ўсё абумоўлена асаблівай важнасцю пытанняў, вынесеных сёння на разгляд", - растлумачыў кіраўнік дзяржавы.-0-

Навіны рубрыкі Прэзідэнт
Поўная версія