21 красавіка, Мінск /Кар. БЕЛТА/. У школах неабходна добра прадуманая прафарыентацыя. Аб гэтым Прэзідэнт Беларусі Аляксандр Лукашэнка заявіў сёння, звяртаючыся са штогадовым Пасланнем да беларускага народа і Нацыянальнага сходу, перадае карэспандэнт БЕЛТА.
"У каледжы і ВНУ маладыя людзі не павінны ісці толькі па набраных балах і наўгад. Патрэбна добра прадуманая прафарыентацыя. І каб вучні яшчэ ў школе набывалі навыкі іх будучых прафесій", - сказаў кіраўнік дзяржавы.
Для гэтага патрабуюцца новыя адукацыйныя праграмы і методыкі, якія прадугледжваюць выданне адпаведных падручнікаў і дапамог. Такая работа ўжо ідзе, дадаў Прэзідэнт.
Першарадную значнасць набывае задача інтэграцыі вучобы і вытворчасці, дадаў Аляксандр Лукашэнка. Паводле яго слоў, трэба актыўна развіваць партнёрскія адносіны прадпрыемстваў з установамі адукацыі і сумеснымі намаганнямі ўдасканальваць матэрыяльна-тэхнічную базу спецыялізаваных устаноў, ВНУ.
"Я неаднаразова падкрэсліваў, студэнтаў апошніх курсаў неабходна ўключаць у працэсы вытворчасці. І не толькі апошніх курсаў: трэба з другога іх цягнуць на поле, да станка, - сказаў кіраўнік дзяржавы. - Можна таксама разгледзець пытанне змяншэння тэрмінаў падрыхтоўкі спецыялістаў: калі за тры гады магчыма падрыхтаваць спецыяліста, давайце рыхтаваць і давучваць чацвёрты год на вытворчасці. Няхай ён там праходзіць спецыялізацыю. Трэба вярнуцца яшчэ раз да гэтага пытання".-0-
