7 красавіка, Мінск /Аліна Грышкевіч - БЕЛТА/. Прэзідэнт Беларусі Аляксандр Лукашэнка азнаёміўся з выстаўкай навуковых і навукова-тэхнічных дасягненняў, якая была прадстаўлена ў Нацыянальнай акадэміі навук у ходзе нарады аб праблемах і перспектывах развіцця беларускай навукі, перадае карэспандэнт БЕЛТА.
Кіраўнік дзяржавы грунтоўна азнаёміўся з усімі стэндамі і напрамкамі, пацікавіўся эфектыўнасцю ўкаранення распрацовак на практыцы. Асаблівую ўвагу Прэзідэнт звярнуў на новаўвядзенні ў сферы энергетыкі, прамысловасці, касмічных тэхналогій, біятэхналогій.
Свае найноўшыя распрацоўкі прадставілі амаль 40 арганізацый па такіх тэматычных напрамках, як прамысловыя тэхналогіі, энергетыка; інфармацыйныя, касмічныя тэхналогіі; адытыўныя тэхналогіі, нанаіндустрыя; абараназдольнасць і бяспека; біятэхналогіі, медыцына, фармацыя. Сярод амаль 150 экспанатаў - новаўвядзенні ў геномных тэхналогіях, рэпрадуктыўнай медыцыне, у галіне дыягностыкі і лячэння анказахворванняў, а таксама праграмна-мадэліруючы комплекс для адпрацоўкі арбітальных сістэм тэрмарэгулявання касмічных апаратаў.
На выстаўцы прадстаўлены вынікі навуковых даследаванняў і распрацовак арганізацый НАН, міністэрстваў прамысловасці, адукацыі, аховы здароўя, Дзяржкамваенпрама, Мінабароны, Дзяржкамітэта па навуцы і тэхналогіях, інавацыйных прадпрыемстваў. Прадэманстравана эфектыўнасць рэалізацыі дзяржаўных праграм у сферах навуковай, навукова-тэхнічнай і інавацыйнай дзейнасці і работы па ўмацаванні сувязі навукі з вытворчасцю.-0-