23 красавіка, Шклоўскі раён /Кар. БЕЛТА/. У Беларусі няма ніякіх падстаў для росту цэн. Аб гэтым Прэзідэнт Беларусі Аляксандр Лукашэнка заявіў 21 красавіка ў гутарцы з журналістамі ў час рэспубліканскага суботніка, паведамляе карэспандэнт БЕЛТА.
Кіраўнік дзяржавы адзначыў, што, напрыклад, адносна паслуг ЖКГ прынята рашэнне не павышаць іх кошт больш як на $5 у год. "Мы перажывалі $5, нават у зімовы час. Няма неабходнасці павышаць. І ён (кошт ЖКП. - Заўвага БЕЛТА) не будзе расці, таму што там дзяржава сама рэгулюе цэны", - сказаў Прэзідэнт.
Аляксандр Лукашэнка лічыць, што няма падстаў і для росту цэн на прадукты харчавання, паколькі абсалютная большасць прадуктаў харчавання - беларускай вытворчасці, а імпартны складнік невялікі. "І сярод тых, хто нам пастаўляе, пайшла канкурэнцыя. Нават па бананах, па іншых таварах. Яны не павысяць, таму што вылецяць з рынку. Гэта значыць, аб'ектыўна няма прычын для росту цэн", - падкрэсліў беларускі лідар.
Ён таксама адзначыў, што Беларусь, з'яўляючыся членам ЕАЭС, фактычна апынулася ва ўмовах работы ў фармаце Сусветнай гандлёвай арганізацыі, улічваючы членства ў гэтым аб'яднанні іншых членаў саюза. "Як толькі мы па нейкіх групах тавараў павысім цэны, адразу ж хлынуць тавары з іншых краін. Таму вытворца і прадавец, які гандлюе таварамі, глядзіць па баках", - сказаў Прэзідэнт.
Аляксандр Лукашэнка заўважыў, што рост цэн магчымы толькі пры якіх-небудзь форс-мажорных абставінах, прадыктаваных звонку. Напрыклад, рэзкі спад на рынках асноўных краін-партнёраў або абвастрэнне сітуацыі на сусветных рынках у выніку якіх-небудзь ваенных дзеянняў. Аднак кіраўнік дзяржавы ўпэўнены, што гэтага не адбудзецца. "Мы з нашай кіруемасцю зробім усё для таго, каб людзі не пацярпелі ад канфліктаў, якія адбываюцца вакол", - запэўніў Прэзідэнт.
"Таму няма падстаў для таго, каб была нейкая цэнавая свістапляска", - упэўнены беларускі лідар.
Аляксандр Лукашэнка таксама адзначыў, што з пункту гледжання вытворцы тавараў рост цэн на тую ці іншую прадукцыю з'яўляецца ў тым ліку крыніцай дадатковых даходаў. "У мінулыя гады, калі мы рухалі цэны па мясе, малаку і іншым, гэтыя грошы не заставаліся ў перапрацоўшчыка або ў гандлі. Усе грошы ішлі сялянам", - сказаў Аляксандр Лукашэнка.
"Сёння мы бачым, што, вядома, не панствуюць сяляне. Вядома, у сельскай гаспадарцы заўсёды складана ў любой краіне. Але жыць можна. Той, хто добра працуе, а гэта ўжо больш за палавіну гаспадарак. Я не кажу пра фермераў і гэтак далей. Яны не карыстаюцца ніякай падтрымкай дзяржавы. А калі і карыстаюцца - гэта ім у плюс. Яны самі сябе забяспечваюць. У нас чвэрць сельскай гаспадаркі, куды мы павінны кінуць нашы намаганні. Таму няма падстаў для росту (цэн. - Заўвага БЕЛТА)", - рэзюмаваў беларускі лідар.-0-
