15 сакавіка, Мінск /Уладзімір Мацвееў - БЕЛТА/. Развіццё ў Беларусі шматпартыйнай сістэмы перш за ўсё неабходна замацаваць канстытуцыйна. Такое меркаванне Прэзідэнт Беларусі Аляксандр Лукашэнка выказаў сёння на сустрэчы з суддзямі Канстытуцыйнага суда, перадае карэспандэнт БЕЛТА.
Гаворачы аб магчымасці ў будучым абмеркавання тых ці іншых змяненняў у Канстытуцыю, Прэзідэнт прывёў у якасці прыкладу вострыя дэбаты па пытанні стварэння ў краіне паўнацэннай шматпартыйнай сістэмы. У прыватнасці, агучваюцца прапановы стварыць вялікую партыю на базе "Белай Русі", каб яна была выразнікам інтарэсаў. "Я катэгарычна супраць, каб гэта была праўладная партыя, каб там усе начальнікі сядзелі, - заўважыў беларускі лідар. - Ідзе гэта размова. Нехта гаворыць - час, трэба штосьці зняць з улады, перадаць у партыі, трэба кадравыя пытанні вырашаць і іншае. Усё гэта правільна. Нехта гаворыць, што не час".
"Я лічу, што не з гэтага трэба пачынаць. Трэба наперадзе паставіць "каня". Трэба Канстытуцыяй замацаваць, калі мы да гэтага гатовы. Калі мы гатовы сёння да гэтых бесперапынных дэбатаў. Калі мы гатовы стварыць сапраўдную шматпартыйную сістэму, - заявіў Аляксандр Лукашэнка. - Нам трэба пачынаць з Канстытуцыі і там прапісваць строга гэту шматпартыйную сістэму, якая роля партый. Бо ў грамадстве пародзім гэту бойку. Таму трэба вельмі акуратна".
Кіраўнік дзяржавы таксама канстатаваў, што колькасны склад многіх партый цяпер вельмі нізкі.
Звяртаючыся да суддзяў Канстытуцыйнага суда, ён падкрэсліў высокую ступень адказнасці пры распрацоўцы тых ці іншых прапаноў па змяненні Канстытуцыі. "Там нічога асабістага не павінна быць. Там усё павінна быць нацэлена на тое, што заўтра нас не будзе, а застануцца нашы дзеці і ўнукі, і якое мы грамадства, на падставе якой Канстытуцыі прапануем сфарміраваць. Боль ваш павінен быць звернуты да дзяцей і ўнукаў. І ніякай там не павінна быць "групаўшчыны". Мы ад гэтага ўсяго павінны адысці і глядзець наперад", - сказаў Прэзідэнт.
Ён адзначыў, што суддзі Канстытуцыйнага суда - гэта спецыялісты высокага класа, ад іх хацелася б большай аддачы для краіны. "Я не дарэмна сказаў аб Канстытуцыі. Гэта не заўтрашняга, не сённяшняга дня праблема", - лічыць Аляксандр Лукашэнка.
Разам з тым кіраўнік дзяржавы адзначыў, што ў выпадку ўзнікнення ў будучым неабходнасці па змяненні Канстытуцыі будуць патрэбны нейкія напрацоўкі. "А раптам жыццё перад намі паставіць пытанне, магчыма, не рубам, але складзецца сітуацыя, што трэба хутка, на працягу года, выдаць новую Канстытуцыю, пакласці народу на стол - галасуйце (я прыхільнік толькі ўсенароднага рэферэндуму), а ў нас напрацовак не будзе", - выказаў меркаванне беларускі лідар.
У сувязі з гэтым ён лічыць неабходным паступова вычленіць групы, якія будуць займацца аналізам і распрацоўкай магчымых прапаноў. "Групкі гэтыя вычленіце і прапануйце, магчыма, нават і варыянт нейкай Канстытуцыі. Тады мы сядзем, трэба - створым канстытуцыйную камісію, каб гэта было прыгожа, з усіх слаёў падцягнем людзей, абмяркуем гэтыя варыянты пасля таго, як прапрацуем. І гэта сапраўды будзе найвялікшы ўклад Канстытуцыйнага суда ў распрацоўку новай Канстытуцыі або яе змяненняў. Усё роўна да гэтага прыйдзем", - рэзюмаваў Аляксандр Лукашэнка.-0-
