13 лістапада, Мінск /Уладзімір Мацвееў - БЕЛТА/. Прэзідэнт Беларусі Аляксандр Лукашэнка расказаў аўстрыйскаму бізнесу пра галоўныя прынцыпы ў супрацоўніцтве з Беларуссю. Адпаведныя заявы ён зрабіў сёння ў Вене, выступаючы на двухбаковым дзелавым форуме, перадае карэспандэнт БЕЛТА.
Гаворачы пра свой удзел у бізнес-форуме, Аляксандр Лукашэнка адзначыў, што справа не ў тым ці іншым сігнале, які павінна атрымаць бізнес-супольнасць. "Я перш за ўсё хацеў прадэманстраваць сваю павагу да вас. А калі нехта хоча яшчэ і сігнал атрымаць, я не супраць, лічыце, што гэты сігнал вы цяпер атрымліваеце", - сказаў кіраўнік дзяржавы.
Прэзідэнт падкрэсліў, што ў краін ёсць вялікі нерэалізаваны патэнцыял, і тавараабарот у раёне $200 млн ён назваў не інакш як ганьбай. "Гэта ганьба. Мы павінны ад гэтай ганьбы хутка адыходзіць", - заявіў беларускі лідар.
Аляксандр Лукашэнка адкрыта сказаў прадстаўнікам бізнесу: "Калі вы, прыйшоўшы да нас з інвестыцыямі, будзеце працаваць і ставіцца да беларусаў так, як да аўстрыйцаў, вы заўсёды будзеце маімі грамадзянамі, і я вас буду ўсяляк падтрымліваць".
Прэзідэнт падкрэсліў гатоўнасць выбудоўваць з замежным бізнесам празрыстыя і ўзаемавыгадныя адносіны. "Самае галоўнае - вам не трэба прыносіць чамаданы грошай для хабараў. Калі вы толькі гэта зробіце, вас ніколі не будзе ў Беларусі. Дакладней, будзеце, але толькі ў месцах не такіх аддаленых. Таму вас папярэджваю: ніякіх хабарніцтва і карупцыі мы не пацерпім. Прыходзьце сумленна, адкрыта, празрыста", - запрасіў кіраўнік дзяржавы.
Ён запэўніў, што ў краіне будуць строга прытрымлівацца дасягнутых дамоўленасцей: "Калі мы дамовімся, мы заўсёды выканаем свае абавязацельствы, нават калі потым акажацца, што гэта на шкоду нашай краіне. Дагавор даражэй за грошы!"
"Вось галоўныя прынцыпы, якіх мы будзем прытрымлівацца ў рабоце з вамі. Прыходзьце, будзем працаваць. Прыходзьце ў бяспечную краіну, дзе высокакваліфікаваныя людзі, дзе людзі адказныя, якія нацярпеліся за ўсю сваю гісторыю і ўмеюць цаніць заробленыя цэнт, рубель, еўра або капейку", - падкрэсліў кіраўнік дзяржавы.
На заканчэнне бізнес-форуму быў падпісаны шэраг дакументаў. Паводле слоў старшыні БелГПП Уладзіміра Улаховіча, гэта прынясе ў скарбонку двухбаковага тавараабароту больш за $200 млн.
Заключаны мемарандум аб узаемаразуменні аб супрацоўніцтве паміж Міністэрствам прыродных рэсурсаў і аховы навакольнага асяроддзя Беларусі і Аўстрыйскім энергетычным агенцтвам.
Падпісана пагадненне аб супрацоўніцтве паміж "Фамед Інжынірынг ГмбХ" і таварыствам з абмежаванай адказнасцю "АК-Мёры" (AK-Miory Ltd.).
З удзелам ААТ "БМЗ - кіруючая кампанія холдынга "БМК" падпісана адразу тры дакументы. Гэта пагадненне з Pisec Group Austria GmbH аб прадастаўленні БМЗ у 2020 годзе дадатковага нязвязанага фінансавання ў памеры да 20 млн еўра для вытворчых патрэб і трохбаковае пагадненне з Pisec Group Austria GmbH і галандскай кампаніяй Merksteijn International B.V. на пастаўку ў 2020 годзе на еўрапейскі рынак да 180 тыс. т беларускай катанкі на агульную суму звыш 70 млн еўра.
Акрамя таго, заключана гадавое рамачнае пагадненне з Belmet Handelsgesellschaft mbH аб пастаўках на 2020 год металапрадукцыі на агульную суму 27,5 млн еўра.
Пагадненне аб супрацоўніцтве падпісана паміж СЗАТ "Бяспечныя дарогі Беларусі" і Siemens AG Austria.
У Вене ў час афіцыйнага візіту кіраўніка беларускай дзяржавы таксама былі падпісаны сумесная дэкларацыя аб умацаванні супрацоўніцтва ў галіне сувязі, інфармацыйна-камунікацыйных тэхналогій і развіцця шырокапалоснай сеткі 5G, пагадненне аб навуковым супрацоўніцтве паміж НАН Беларусі і Аўстрыйскай акадэміяй навук.-0-
