13 лютага, Мінск /Кар. БЕЛТА/. Прэзідэнт Беларусі Аляксандр Лукашэнка патрабуе строгага пакарання для "круцякоў" на квадрацыклах і снегаходах за язду па сельгасугоддзях. Аб гэтым ён заявіў сёння на пасяджэнні Савета бяспекі, перадае карэспандэнт БЕЛТА.
"Пытанне да міністра ўнутраных спраў адно: калі будзе наведзены парадак? - задаў пытанне кіраўнік дзяржавы. - Парадак ва ўсім, каб мне не пісалі, што там некаторыя "круцякі" ў нас з'явіліся. Гэта ж не дзеці простых людзей. А самі крутыя і іх дзеткі сёння на квадрацыклы, снегаходы і пайшлі па азімых, па палях, на што я звяртаў увагу, а вы мне адпіскі пішаце".
Кіраўнік дзяржавы запатрабаваў прыцягнуць іх да адказнасці і забраць гэтыя транспартныя сродкі. "Вось і ўсё вырашэнне пытання, - сказаў ён. - Я хачу, каб гэту маю заяву грамадства пачула".
Пры гэтым Прэзідэнт звярнуў увагу на той факт, што па-ранейшаму аварыі на дарогах здараюцца з удзелам супрацоўнікаў органаў унутраных спраў. "Аб якім аўтарытэце міліцыі можна тады гаварыць? Пытанне да міністра: у чым справа? Якія меры прымаюцца па выкараненні такіх фактаў?" - строга паставіў пытанні Аляксандр Лукашэнка.-0-
