28 красавіка, Жыткавіцкі раён /Уладзімір Мацвееў - БЕЛТА/. Патрабаванні да дысцыпліны на прадпрыемствах будуць значна ўзмацняцца. Аб гэтым Прэзідэнт Беларусі Аляксандр Лукашэнка заявіў сёння на нарадзе ў Жыткавіцкім райвыканкаме, перадае карэспандэнт БЕЛТА.
"Калі вы бачыце, што кіраўнік не цягне - не трэба яго там мучыць. Пачынайце закручваць гайкі. Вы (старшыня райвыканкама. - Заўвага БЕЛТА) на сваім узроўні, а кіраўнік у сваім калектыве. Але не перашкаджайце кіраўніку працаваць. Наадварот, падтрымлівайце і абараняйце", - сказаў Аляксандр Лукашэнка.
Кіраўнік дзяржавы звярнуў увагу і на праблему п'янства. "Дысцыпліна будзе ўзмацняцца значна. Няма дысцыпліны - няма чаго працаваць. Дысцыпліна і тэхналогія!" - падкрэсліў беларускі лідар.
"Таму ўзмацняйце дысцыпліну, як тут, у Гомельскай вобласці, так і па краіне ў цэлым", - даручыў Прэзідэнт.
На нарадзе прадметна разгледжана работа прадпрыемстваў Жыткавіцкага раёна, як у сферы АПК, так і прамысловасці. Дадзены канкрэтныя даручэнні.
Абмеркаваны пытанні жыллёвага будаўніцтва, замацавання кадраў, сітуацыя з узроўнем заработнай платы. Кіраўнік дзяржавы адзначыў, што ў пытанні зарплат неабходна больш актыўна працаваць, каб выходзіць на ўзровень у памеры Br1 тыс.
Ёсць нядрэнныя перспектывы і адносна карысных выкапняў. Раён і ў цэлым Гомельская вобласць мае запасы торфу і сапрапеляў. Попыт на гэту прадукцыю, як паведаміў віцэ-прэм'ер Міхаіл Русы, ёсць і ў Еўрасаюзе, і ў іншых рэгіёнах. Вядзецца работа па асваенні гэтых радовішчаў і далейшым прасоўванні прадукцыі.
Аляксандр Лукашэнка таксама звярнуў увагу на праблемныя моманты з даўгавой нагрузкай на прадпрыемствах, каб нават пры ўмове рэструктурызацыі тых ці іншых даўгоў забяспечвалася вяртанне пазыковых сродкаў і ў цэлым эфектыўная работа.
Уздымаліся і іншыя пытанні. Кіраўнік дзяржавы асабліва падкрэсліў недапушчальнасць фактаў браканьерства, а таксама карупцыі. "Кіраўнік павінен быць чысты, як шкло. Каб ніхто не падкапаўся. Вы павінны быць самі ідэальнымі, як знешне, так і ўнутрана. Час такі. Страцім краіну - ніхто не даруе", - сказаў ён.
Прэзідэнт закрануў і пытанне развіцця прадпрымальніцкай ініцыятывы, нагадаўшы аб прынятым пакеце дакументаў па лібералізацыі ўмоў для вядзення бізнесу. Аднак з кіраўнікоў будзе строгае патрабаванне за забеспячэнне належных умоў працы і бяспекі ў цэлым.-0-
