23 чэрвеня, Мінск /Святлана Саўко - БЕЛТА/. Прэзідэнт Беларусі Аляксандр Лукашэнка не выключае, што ў будучым у вёсцы могуць застацца толькі аграгарадкі. Такое меркаванне кіраўнік дзяржавы выказаў сёння, каменціруючы выступленні дэлегатаў V Усебеларускага народнага сходу, перадае карэспандэнт БЕЛТА.
Прэзідэнт адзначыў, што за такімі населенымі пунктамі будучае. "Мне здаецца, што ў будучым у вёсцы застануцца толькі аграгарадкі", - сказаў Аляксандр Лукашэнка. Пры гэтым кіраўнік дзяржавы дадаў, што яму як чалавеку вясковаму не падабаецца такая перспектыва.
"Калі ў нас атрымаецца затармазіць працэс збірання ўсіх працоўных рэсурсаў у аграгарадкі, то мы яго будзем тармазіць праз развіццё былых цэнтраў далучаных гаспадарак", - заявіў Прэзідэнт. Кіраўнік дзяржавы паставіў задачу звярнуць сур'ёзную ўвагу на развіццё такіх населеных пунктаў. "Іх трэба захаваць, - перакананы Аляксандр Лукашэнка. - Калі мы ўбачым, што людзі там затрымаюцца, мы іх будзем інтэнсіўна развіваць, для таго каб не ўсё сельскае насельніцтва з'ехалася ў аграгарадкі".
Дзяржава не пакіне без увагі і так званыя неперспектыўныя вёскі, разлічваючы ў тым ліку на падтрымку бізнесменаў, многія з якіх родам з такіх невялікіх вёсак.
Прэзідэнт адзначыў, што ў Беларусі пабудавана больш як 1,5 тыс. аграгарадкоў, на развіццё вёскі за час рэалізацыі дзвюх адпаведных праграм накіравана больш за $50 млрд.-0-
