Лукашэнка: Беларусь можа стаць для Пакістана інвестыцыйным акном у Еўропу

5 кастрычніка, Ісламабад /Міхаіл Маціеўскі - БЕЛТА/. Беларусь можа стаць для Пакістана інвестыцыйным акном у Еўропу. Аб гэтым Прэзідэнт Беларусі Аляксандр Лукашэнка заявіў у час адкрыцця IV Беларуска-пакістанскага дзелавога і інвестыцыйнага форуму, перадае карэспандэнт БЕЛТА.

"Безумоўна, актывізацыя беларуска-пакістанскага інвестыцыйнага супрацоўніцтва будзе садзейнічаць росту эканомікі як Пакістана, так і Беларусі. І важная роля ў гэтым працэсе павінна належаць бізнесменам і прадпрымальнікам, якія сабраліся ў гэтай зале", - лічыць Прэзідэнт.

Аляксандр Лукашэнка адзначыў, што да гэтага часу краіны не могуць пахваліцца поспехамі ў гэтым напрамку. "Аднак рост вашай эканомікі, павелічэнне яе магчымасцей па замежным укладанні капіталаў ствараюць спрыяльныя перадумовы для таго, каб Беларусь па праву стала для Пакістана інвестыцыйным акном у Еўропу", - звярнуў увагу кіраўнік дзяржавы.

Прэзідэнт заўважыў, што за апошні год Беларусь і Пакістан абмяняліся чатырма афіцыйнымі візітамі на вышэйшым і высокім узроўнях. У час кожнага праводзіўся дзелавы і інвестыцыйны форум, што сведчыць аб цвёрдым намеры бакоў развіваць плённыя адносіны паміж дзелавымі коламі дзяржаў.-0-

Беларусь і Пакістан дамовіліся дасягнуць тавараабароту $1 млрд за чатыры гады

"Мы дамовіліся з прэм'ер-міністрам на працягу чатырох гадоў вывесці наш тавараабарот на ўзровень млрд. Як хочаце дамаўляйцеся паміж сабой, але праз чатыры гады млрд, не менш (больш можна), павінен быць", - звярнуўся Аляксандр Лукашэнка да прадстаўнікоў дзелавых колаў абедзвюх краін.

Лукашэнка заклікаў бізнесменаў Пакістана больш шырока выкарыстоўваць прамысловыя магчымасці Беларусі

"Заклікаю пакістанскіх бізнесменаў больш шырока выкарыстоўваць нашы прамысловыя магчымасці ў рэалізацыі разнастайных інфраструктурных праектаў у вашай краін", - сказаў Аляксандр Лукашэнка.

Лукашэнка ўпэўнены ў перспектыўнасці інвестыцыйнага супрацоўніцтва Беларусі з Пакістанам

"Звяртаючыся да ўдзельнікаў нашага форуму, я запрашаю пакістанскіх бізнесменаў укладваць інвестыцыі ў выгадныя для вас праекты на тэрыторыі Беларусі. Упэўнены, у такога супрацоўніцтва добрыя перспектывы", - падкрэсліў Аляксандр Лукашэнка.