17 лістапада, Мінск /Кар. БЕЛТА/. Выбары ў парламент адбыліся ва ўсіх 110 акругах, заявіла старшыня ЦВК Лідзія Ярмошына ў эфіры тэлеканала "Беларусь 1", перадае карэспандэнт БЕЛТА.
"Усе выбарчыя акругі Беларусі паказваюць, што яўка перасягнула 50 працэнтаў. Такім чынам, можна лічыць, што ўсе дэпутаты будуць выбраны, таму што ў нас няма ніводнай безальтэрнатыўнай акругі", - сказала Лідзія Ярмошына.
Адказваючы на пытанне аб уплыве Instagram і іншых сацыяльных сетак на яўку, старшыня ЦВК выказала меркаванне, што сацсеткі павышаюць актыўнасць выбаршчыкаў на выбарах.
"На 18.00 мы называем яўку 70,72 працэнта, і дзве гадзіны галасавання засталося (да 20.00 - Заўвага БЕЛТА). А калі возьмем выбары 2016 года, там на 20.00 яўка была 74 працэнты. Гэта значыць можна гаварыць, што ідзе павышэнне цікавасці да выбараў, думаю, перш за ўсё за кошт інтэрнэту", - адзначыла Лідзія Ярмошына.-0-
