21 лютага, Мінск /Кар. БЕЛТА/. Нацыянальны каардынатар па дасягненні Мэт устойлівага развіцця, намеснік старшыні Савета Рэспублікі Мар'яна Шчоткіна на сесіі "Нацыянальная палітыка і інстытуты: пашырэнне МУР праз абмен вопытам і ведамі" Рэгіянальнага форуму нацыянальных каардынатараў абазначыла важныя для Беларусі аспекты міжнароднага ўзаемадзеяння па Парадку дня-2030, перадае карэспандэнт БЕЛТА.
Беларусь зрабіла шэраг важных захадаў для дасягнення МУР. Урадам адобрана Нацыянальная стратэгія ўстойлівага сацыяльна-эканамічнага развіцця на перыяд да 2030 года. Выбудавана нацыянальная архітэктура па дасягненні Мэт устойлівага развіцця. Работа ў сферы дасягнення МУР праводзіцца дзяржавай ва ўзаемадзеянні з бізнес-коламі, грамадзянскай супольнасцю і міжнароднымі арганізацыямі. "У лістападзе мінулага года эксперты місіі ААН - MAPS-місіі правялі ацэнку элементаў праводзімай намі работы па МУР. Мы абмеркавалі сітуацыю ў краіне і пррапановы па выпрацоўцы дарожнай карты па дасягненні МУР у Беларусі. Місія адзначыла дасягненні рэспублікі ў пытаннях гендарнай роўнасці, мацярынства і дзяцінства, сацыяльнай падтрымкі насельніцтва. Гэта Мэты ўстойлівага развіцця 1, 2, 3, 5. І мы гатовы дзяліцца нашымі напрацоўкамі ў названых галінах", - адзначыла Мар'яна Шчоткіна. Але разам з тым ёсць няпростыя пытанні, з якімі Савет па ўстойлівым развіцці Беларусі сутыкнуўся пры рабоце і ў сваю чаргу разлічвае на дапамогу міжнародных партнёраў.
Па-першае, гэта вялікі аб'ём задач па нацыяналізацыі глабальных паказчыкаў і імплементацыі індыкатараў устойлівага развіцця ў праграмныя дакументы. "Спатрэбілася распрацоўка нацыянальнай платформы вядзення баз даных у адпаведнасці з міжнароднымі падыходамі. Чакаем, што яна будзе сфарміравана да канца 2018 года", - сказала Мар'яна Шчоткіна і звярнулася да ўдзельнікаў форуму за дадатковым садзейнічаннем у вырашэнні гэтай няпростай задачы.
Таксама для краін з сярэднім узроўнем даходаў, да якіх адносіцца і Беларусь, важна падтрымка з боку міжнародных партнёраў у сферы фарміравання інстытуцыянальных асноў устойлівага развіцця. Істотную падтрымку ў гэтым рэспубліцы ўжо аказаў рэалізуемы сумесна з Праграмай развіцця ААН праект міжнароднай тэхнічнай дапамогі "Падтрымка дзейнасці нацыянальнага каардынатара па дасягненні Мэт устойлівага развіцця і ўмацаванне ролі парламента ў дасягненні Мэт устойлівага развіцця".
"Фарміраванне грамадскай свядомасці, арыентаванай на ўстойлівае развіццё, - працяглы, але неабходны працэс. Тут важная роля адукацыі ў мэтах устойлівага развіцця, выхавання дзяцей і моладзі, шырокага інфармавання грамадскасці аб МУР. Было б цікава пачуць ад удзельнікаў мерапрыемства прапановы і ідэі па гэтым пытанні - як уключыць у гэту работу кожнага", - заявіла нацыянальны каардынатар.
Яшчэ адна тэма, якая займае асаблівую ўвагу Савета, - адсутнасць абагульненай інфармацыі аб вопыце арганізацыі работы па дасягненні МУР у краінах свету. "Лічым, што фарміраванне базы даных аб перадавым вопыце і лепшых практыках выбудоўвання работы на нацыянальным узроўні па мэтах Парадку дня-2030 было б карысна ўсім. Як варыянт, у нашым рэгіёне садзейнічанне ў фарміраванні такога інфармацыйнага рэсурсу магла б аказаць Еўрапейская эканамічная камісія ААН. Гэту прапанову, вядома, трэба яшчэ дадаткова абмеркаваць у Жэневе", - рэзюмавала Мар'яна Шчоткіна.
Рэгіянальны форум нацыянальных каардынатараў праходзіць у Мінску 21-22 лютага. Ён сабраў дэлегацыі больш як з 40 краін. Гэта высокія службовыя асобы, прадстаўнікі міжнародных арганізацый. Удзельнікі форуму абмяняюцца вопытам па дасягненні Мэт устойлівага развіцця, абмяркуюць праблемныя пытанні выканання Парадку дня ў галіне ўстойлівага развіцця на перыяд да 2030 года.-0-
