9 лістапада, Масква /Эдуард Півавар - БЕЛТА/. Роля рэгіянальных сродкаў масавай інфармацыі ў інфармацыйным забеспячэнні будаўніцтва Саюзнай дзяржавы будзе разглядацца на пасяджэнні камісіі Парламенцкага сходу Саюза Беларусі і Расіі па інфармацыйнай палітыцы. Мерапрыемства адбудзецца 16 лістапада ва Уладзікаўказе, паведамілі БЕЛТА ў прэс-службе сходу.
"Дэпутаты абмяркуюць ролю рэгіянальных СМІ ў інфармацыйным забеспячэнні будаўніцтва Саюзнай дзяржавы і азнаёмяцца з вопытам работы сродкаў масавай інфармацыі Рэспублікі Паўночная Асеція - Аланія па асвятленні беларуска-расійскіх адносін, - адзначылі ў прэс-службе. - Удзельнікі пасяджэння разгледзяць пытанні дзейнасці саюзных СМІ, а таксама перспектывы ўзаемадзеяння камісіі Парламенцкага сходу па інфармацыйнай палітыцы з камісіяй Маладзёжнай палаты па інфармацыйнай палітыцы ў інфармацыйных тэхналогіях пры Парламенцкім сходзе Саюза Беларусі і Расіі".
Да ўдзелу ў мерапрыемствах запрошаны прадстаўнікі Пастаяннага камітэта Саюзнай дзяржавы, Міністэрства інфармацыі Беларусі, Міністэрства лічбавага развіцця, сувязі і масавых камунікацый Расіі, парламента Паўночнай Асеціі - Аланіі, кіраўнікі СМІ Саюзнай дзяржавы.
"Праграмай візіту дэпутатаў у горад Уладзікаўказ прадугледжаны ўдзел у рабоце IV Міжнароднага эканамічнага форуму "Паўднёвыя вароты Расіі", - дадалі ў прэс-службе.-0-