30 студзеня, Мінск /Кар. БЕЛТА/. Першы намеснік генсакратара ААН Аміна Махамед плануе наведаць рэгіянальны форум каардынатараў па Мэтах устойлівага развіцця (МУР), які пройдзе ў Мінску 21-22 лютага. Падрыхтоўка візіту абмяркоўвалася на сустрэчы намесніка міністра замежных спраў Андрэя Дапкюнаса і Аміны Махамед, якая адбылася ў час візіту беларускай дэлегацыі ў штаб-кватэру ААН у Нью-Ёрку, дзе адкрылася 56-я сесія Камісіі ААН сацыяльнага развіцця (КСР), паведамілі БЕЛТА ў беларускім знешнепалітычным ведамстве.
Маючы адбыцца рэгіянальны форум каардынатараў МУР дасць магчымасць удзельнікам рэгіёна Еўропы і СНД лепш зразумець агульныя праблемы на шляху рэалізацыі мэт і ўнясе важны ўклад у глабальныя намаганні па выкананні Парадку дня ў галіне ўстойлівага развіцця да 2030 года.
Аміна Махамед высока ацаніла дзейнасць Беларусі па дасягненні МУР, асабліва адзначыўшы ўключэнне ўсіх зацікаўленых бакоў у гэту работу. Яна запэўніла ў актыўнай падтрымцы з боку ААН гэтага працэсу.
Акрамя таго, закраналася тэма краін з сярэднім узроўнем даходу ў кантэксце важнасці такіх краін для выканання Парадку дня-2030.
Андрэй Дапкюнас таксама правёў сустрэчу з намеснікам генеральнага сакратара ААН па пытаннях барацьбы з тэрарызмам Уладзімірам Варанковым. Бакі абмяняліся думкамі наконт бягучай сітуацыі і новых выклікаў у галіне барацьбы з тэрарызмам. Намеснік міністра праінфармаваў Уладзіміра Варанкова аб беларускіх ініцыятывах па барацьбе з тэрарызмам у міжнародных арганізацыях, запрасіў яго да ўдзелу ў плануемым у кастрычніку 2018 года ў Беларусі мерапрыемстве па лініі АБСЕ адносна барацьбы з кібертэрарызмам.
Уладзімір Варанкоў расказаў аб працэсе фарміравання Контртэрарыстычнага ўпраўлення ААН, а таксама пра бліжэйшыя планы, уключаючы правядзенне першага ў гісторыі ААН саміту кіраўнікоў контртэрарыстычных органаў дзяржаў - членаў ААН у чэрвені 2018 года.
Намеснік генеральнага сакратара ААН высока ацаніў намаганні Беларусі ў галіне барацьбы з тэрарызмам, выказаў гатоўнасць да далейшага ўзаемадзеяння, у тым ліку правядзення сумесных мерапрыемстваў у галіне барацьбы з тэрарызмам у кіберпрасторы.
Камісія ААН сацыяльнага развіцця займаецца пытаннямі скарачэння беднасці, сацыяльнай няроўнасці, а таксама пашырэннем міжнароднай палітыкі пабудовы сацыяльнай справядлівасці ў адносінах да слабаабароненых слаёў насельніцтва. Беларусь выбрана ў склад КСР на 2016-2020 гады. 56-я сесія КСР прадоўжыць работу да 7 лютага.-0-
