30 лістапада, Брэст /Кар. БЕЛТА/. Беларусь і Расія ўзгаднілі ўсе пытанні па падрыхтоўцы пагаднення аб узаемным прызнанні віз. Аб гэтым сёння было заяўлена на пасяджэнні міждзяржаўнай міжведамаснай рабочай групы па выпрацоўцы рэкамендацый па правядзенні ўзгодненай міграцыйнай палітыкі ў Саюзнай дзяржаве, якое прайшло ў Белавежскай пушчы, перадае карэспандэнт БЕЛТА.
"Усе тэхнічныя моманты ліквідаваны. Сёння высокая гатоўнасць да падпісання гэтага дакумента", - паведаміў журналістам намеснік міністра ўнутраных спраў Беларусі - начальнік міліцыі грамадскай бяспекі Мікалай Мельчанка.
Першы намеснік міністра ўнутраных спраў Расіі Аляксандр Гаравой адзначыў, што работа над праектам дакумента прадаўжалася паўтара года. "Мы сёння паставілі кропку ў пытанні ўзгаднення пагаднення аб узаемным прызнанні віз. Спадзяёмся, што ў снежні бягучага года кіраўнікі ўрадаў нашых дзяржаў яго падпішуць", - сказаў ён.
Узаемнае прызнанне віз будзе садзейнічаць росту прывабнасці дзвюх краін, здыме пэўныя бар'еры. З падпісаннем міжурадавага пагаднення будуць створаны прававыя ўмовы для таго, каб грамадзяне трэціх краін у Саюзнай дзяржаве перамяшчаліся па адной візе, якую яны атрымаюць у Беларусі або Расіі.
Для забеспячэння ўнутранай бяспекі бакі дамовіліся аб электронным інфармацыйным узаемадзеянні паміж праваахоўнымі структурамі. "Гэта аблегчыць нам працэдуру кантролю за рэжымам знаходжання грамадзян замежных дзяржаў, уніфікуе спісы грамадзян, у адносінах да якіх прынята рашэнне аб забароне ўезду ў тую ці іншую краіну Саюзнай дзяржавы або, наадварот, выезду", - дадаў Аляксандр Гаравой.
Удзельнікі пасяджэння абмеркавалі таксама практыку рэалізацыі міжнародных і міжведамасных дагавораў, пытанні ўзаемадзеяння кампетэнтных органаў па забеспячэнні ўезду-выезду ўдзельнікаў і замежных турыстаў у час II Еўрапейскіх гульняў, іншыя актуальныя тэмы. Усяго на парадак дня было вынесена 16 пытанняў.
Наступнае, 18-е, пасяджэнне міждзяржаўнай міжведамаснай рабочай групы па выпрацоўцы рэкамендацый па правядзенні ўзгодненай міграцыйнай палітыкі ў Саюзнай дзяржаве адбудзецца ў першым паўгоддзі 2019 года на тэрыторыі Расіі.-0-