15 мая, Мінск /Кар. БЕЛТА/. Нефармальны міністэрскі дыялог краін "Усходняга партнёрства" пройдзе ў чэрвені ў Мінску, паведаміла 14 мая журналістам кіраўнік прадстаўніцтва ЕС у Беларусі Андрэа Віктарын на палях міжнароднага форуму па інфармацыйна-камунікацыйных тэхналогіях "ТІБО-2018", перадае карэспандэнт БЕЛТА.
"Беларусь актыўна ўдзельнічае ў мерапрыемствах у рамках "Усходняга партнёрства" ў сферы развіцця лічбавай эканомікі, і мы вельмі рады, што Беларусь будзе прымаць у сябе нефармальны партнёрскі дыялог у чэрвені бягучага года. Там будзе ісці размова аб лічбавай эканоміцы", - растлумачыла Андрэа Віктарын.
Кіраўнік прадстаўніцтва ЕС падкрэсліла, што правядзенне такога мерапрыемства ў Мінску паказвае патэнцыял для супрацоўніцтва ва "Усходнім партнёрстве". "Мы працуем над пытаннямі гарманізацыі лічбавых рынкаў у ЕС, гэта з'яўляецца нашай мэтай. Беларусь для нас таксама важная краіна ў гэтым сэнсе, і гэта адна з тых сфер, дзе мы можам супрацоўнічаць", - растлумачыла яна.
Андрэа Віктарын расказала, што наведвае форум "ТІБО" не першы раз. "Я была на гэтым мерапрыемстве ў мінулым годзе, яно было вельмі добра арганізавана. Такія мерапрыемствы з'яўляюцца добрай платформай, каб сабрацца і абмеркаваць новыя праекты і ўстанавіць новыя сувязі", - рэзюмавала яна.
XXV Міжнародны форум па інфармацыйна-камунікацыйных тэхналогіях "ТІБО-2018" адкрыўся 14 мая ў Мінску. Цырымонія адкрыцця прайшла ў "Мінск-Арэне". Пасля яе на пленарным пасяджэнні кіраўнікі органаў дзяржкіравання, міжнародных арганізацый, вядучых ІКТ-кампаній абмеркавалі міжнародны вопыт лічбавай трансфармацыі, прагнозы і перспектывы выкарыстання найноўшых тэхналогій.-0-
