24 лістапада, Брусель /Уладзімір Мацвееў - БЕЛТА/. Лідары краін Еўрасаюза заяўляюць аб важнасці партнёрства з усходнімі суседзямі, у тым ліку Беларуссю. Адпаведныя заявы яны зрабілі ў рамках удзелу ў саміце ініцыятывы "Усходняе партнёрства" ў Бруселі, перадае карэспандэнт БЕЛТА.
"Я абсалютна ўпэўнены, што нам неабходна Беларусь у якасці важнага партнёра. Існуюць цесныя эканамічныя сувязі, і мы хацелі б іх развіваць", - сказаў журналістам Федэральны канцлер Аўстрыі Крысціян Керн. Паводле яго слоў, аўстрыйскі бок вельмі зацікаўлены ў здаровым развіцці рэгіёна, а гэта звязана не толькі са стабільнасцю, але таксама і з эканамічным супрацоўніцтвам.
У сваю чаргу Федэральны канцлер Германіі Ангела Меркель падкрэсліла, што адносіны ЕС з краінамі "Усходняга партнёрства" з'яўляюцца вельмі важнымі. "З аднаго боку, мы зацікаўлены ў дабрабыце людзей і дэмакратычным развіцці, а з іншага боку, гэта ў многім звязана з бяспекай", - заявіла яна.
Прэм'ер-міністр Эстоніі (краіна-старшыня ў ЕС) Юры Ратас адзначыў, што ўсходняе партнёрства было ў ліку прыярытэтаў нават да таго, як у ЕС была запушчана адпаведная ініцыятыва. "Сёння мы можам бачыць, што ўсходняе партнёрства прыйшло ў сэрца Еўропы. Я сапраўды спадзяюся на тое, што сёння мы зможам адказаць на пытанне, як гэта партнёрства яшчэ больш узмацніць для народаў шасці краін-партнёраў і ЕС", - адзначыў палітык.
Эдуар Філіп, прэм'ер-міністр Францыі, адзначыў, што яго прысутнасць на саміце прызначана прадэманстраваць уключанасць яго краіны ў партнёрства з усходнімі суседзямі. "Гэта знак таго, што Францыя хоча прадаўжаць свой удзел, каб садзейнічаць пытанням эканамічнага развіцця, барацьбы з карупцыяй, удасканалення ў сферы дзяржкіравання. Па ўсіх гэтых напрамках ужо дасягнуты прагрэс, і мы хочам прадаўжаць работу з нашымі партнёрамі", - заявіў ён.
Прэм'ер-міністр Вялікабрытаніі Тэрэза Мэй, якая прыбыла на саміт, расказала, што бакі вывучаюць магчымасці, як справіцца з агульнымі выклікамі як у сферы бяспекі, так і развіцця. "Я тут таксама для таго каб яшчэ раз сказаць, што Вялікабрытанія, безумоўна, мае намер адыгрываць лідзіруючую ролю ў падтрыманні бяспекі ў Еўропе, - сказала прэм'ер-міністр. - Мы можам пакідаць Еўрасаюз, але мы не пакідаем Еўропу".
Па выніках саміту прынята сумесная дэкларацыя, у якой удзельнікі пацвярджаюць высокую важнасць "Усходняга партнёрства" ў якасці асаблівага вымярэння еўрапейскай палітыкі суседства. У дакуменце гаворыцца аб развіцці і ўмацаванні адносін паміж Еўрасаюзам і краінамі-партнёрамі. Пры гэтым пацвярджаецца суверэннае права кожнай дзяржавы самастойна вызначаць узровень і мэты ў адносінах з ЕС.
Асобная ўвага ўдзелена бяспецы і стабільнасці ў рэгіёне. У прыватнасці, удзельнікі саміту заклікалі аднавіць намаганні для мірнага вырашэння канфліктаў на базе прынцыпаў і норм міжнароднага заканадаўства.
У дэкларацыі таксама гаворыцца аб развіцці ў эканамічнай і сацыяльнай сферах, удасканаленні транспартных сувязей, узаемадзеянні ў энергетыцы, па пытаннях экалогіі, развіцця міжасобасных кантактаў, уключаючы адукацыю, культуру, навуку, маладзёжнае асяродззе.-0-
