15 лютага, Мінск /Кар. БЕЛТА/. Галоўнай тэмай перагавораў трохбаковай кантактнай групы застаецца захаванне рэжыму спынення агню. Аб гэтым 14 лютага журналістам заявіў спецпрадстаўнік АБСЕ ў ТКГ па ўрэгуляванні канфлікту на ўсходзе Украіны Марцін Сайдзік, перадае карэспандэнт БЕЛТА.
Дыпламат расказаў, што "галоўнай тэмай дыскусій было забеспячэнне далейшага захавання рэжыму спынення агню, а таксама забеспячэнне бяспекі грамадзянскага насельніцтва і інфраструктуры".
"ТКГ паўторна пацвердзіла прыхільнасць да раней прынятых рашэнняў па ўсёабдымным устойлівым і бестэрміновым рэжыме спынення агню, а таксама рашэнняў аб развядзенні сіл і сродкаў, адводзе цяжкага ўзбраення, проціміннай дзейнасці і забароне вучэнняў з прымяненнем усіх відаў узбраенняў паблізу лініі сутыкнення", - адзначыў спецпрадстаўнік АБСЕ.
Адпаведныя рашэнні былі выпрацаваны ў Мінску. Марцін Сайдзік падкрэсліў, што гэтымі днямі споўнілася тры гады з моманту падпісання комплексу мер па выкананні мінскіх пагадненняў. "Нягледзячы на пэўныя складанасці, мінскі працэс працуе і прыносіць вынікі", - падкрэсліў ён.
Марцін Сайдзік выказаў сваё меркаванне наконт мэтазгоднасці карэкціроўкі мінскіх пагадненняў з улікам намеру ўвесці ў Данбас міратворцаў ААН. "Лічу, што мінскія пагадненні моцныя, устойлівыя. Калі будзе такая місія ААН, то яе мэтай павінна быць менавіта іх увасабленне", - перакананы дыпламат.-0-
