3 сакавіка, Мінск /Кар. БЕЛТА/. Экспертная група пры ЦВК напрацоўвае матэрыял для сумеснага заключэння па рэкамендацыях БДІПЧ АБСЕ. Аб гэтым карэспандэнту БЕЛТА паведаміў сакратар Цэнтрвыбаркама Беларусі Мікалай Лазавік, каменціруючы ход работы нядаўна створанай пры выбарчым органе структуры.
"Цяпер удзельнікі міжведамаснай групы абменьваюцца інфармацыяй, меркаваннямі, напрацоўваюць матэрыял для агульнага заключэння. Кожнае міністэрства і ведамства, прадстаўнікі якога ўвайшлі ў групу, выказала свае прапановы, і яны былі накіраваны яе кіраўніку (Алене Дмухайла. - Заўвага БЕЛТА). Кіраўнік па электроннай пошце кожную прапанову разаслала членам групы для азнаямлення, каб па выніку можна было прадметна ўсё абмяркоўваць", - растлумачыў Мікалай Лазавік.
Паводле яго слоў, на працягу месяца пасля стварэння міжведамасная група пры Цэнтрвыбаркаме, як плануецца, павінна выпрацаваць сумесныя прапановы і выказаць калегіяльнае меркаванне для наступнага разгляду ў Цэнтральнай камісіі і даклада кіраўніку дзяржавы.
Мікалай Лазавік таксама адзначыў, што пакуль пасяджэнняў экспертнай групы з удзелам супрацоўнікаў сродкаў масавай інфармацыі не запланавана, працэс ідзе ў рабочым парадку.
Міжведамасная экспертная рабочая група па разглядзе рэкамендацый БДІПЧ АБСЕ па пытаннях удасканалення выбарчага працэсу ў Беларусі створана пастановай ад 12 лютага. У лік экспертаў увайшлі прадстаўнікі Цэнтрвыбаркама, Нацыянальнага цэнтра заканадаўства і прававых даследаванняў, абедзвюх палат парламента, Міністэрства юстыцыі, Міністэрства інфармацыі і Міністэрства замежных спраў. Кіраўнік - член ЦВК Алена Дмухайла.
Праводзіцца аналіз рэкамендацый БДІПЧ АБСЕ, якія змешчаны ў падагульняючай справаздачы місіі па назіранні за выбарамі Прэзідэнта Беларусі ў 2015 годзе.-0-
