16 кастрычніка, Мінск /Аліна Грышкевіч - БЕЛТА/. Намеснік міністра замежных спраў Беларусі Андрэй Дапкюнас сёння сустрэўся з намеснікам генеральнага сакратара НАТА па новых выкліках бяспецы Антоніа Місіролі, паведамілі БЕЛТА ў прэс-службе МЗС.
Антоніа Місіролі стаў самым высокім за апошнія 27 гадоў прадстаўніком кіраўніцтва сакратарыята Паўночнаатлантычнага альянса, які наведаў Беларусь. Субяседнікі адзначылі паступовую тэндэнцыю паляпшэння адносін Беларусі і НАТА, абмеркавалі пытанні развіцця супрацоўніцтва Беларусі з краінамі-членамі і партнёрамі НАТА ў розных галінах, у тым ліку ў сферы барацьбы з новымі выклікамі і пагрозамі, уключаючы тэрарызм.
Андрэй Дапкюнас падкрэсліў гатоўнасць беларускага боку да канструктыўнага дыялогу і ўзаемадзеяння з НАТА на ўзаемапаважальнай і раўнапраўнай аснове. Ён праінфармаваў Антоніа Місіролі аб выніках міжнароднай канферэнцыі высокага ўзроўню "Барацьба з тэрарызмам пры дапамозе інавацыйных падыходаў і выкарыстання новых і ўзнікаючых тэхналогій", якая адбылася ў Мінску 3-4 верасня.
Беларускі дыпламат таксама прыцягнуў увагу субяседніка да ініцыятыў Беларусі аб стварэнні "пояса лічбавага добрасуседства", а таксама распрацоўкі дэкларацыі аб неразмяшчэнні ракет сярэдняй і меншай далёкасці ў Еўропе, адзначыўшы, што прапановы беларускага боку накіраваны на зніжэнне канфрантацыі, аднаўленне даверу і ўмацаванне дружалюбных сувязей паміж краінамі.-0-
