21 чэрвеня, Мінск /Аліна Грышкевіч - БЕЛТА/. Беларусі і ЕС у апошнія гады ўдалося выбудаваць даверныя адносіны. Гэта адзначыў еўракамісар па еўрапейскай палітыцы суседства і перагаворах аб пашырэнні ЕС Ёханес Хан сёння на сустрэчы з Прэзідэнтам Беларусі Аляксандрам Лукашэнкам, перадае карэспандэнт БЕЛТА.
"Перш за ўсё дазвольце згадзіцца з вашымі словамі, што за апошнія некалькі гадоў нам удалося выбудаваць узаемадаверныя адносіны, - сказаў Ёханес Хан. - Таму што толькі на такой аснове мы зможам дасягнуць чагосьці канкрэтнага ў інтарэсах грамадзян. І маё бачанне - гэта стварэнне пояса дабрыбыту ў рамках Еўрапейскага саюза і еўрапейскага партнёрства. Менавіта гэта будзе служыць найлепшай гарантыяй для нашай бяспекі і стабільнасці".
Як падкрэсліў Ёханес Хан, гэтага можна дасягнуць толькі пры паляпшэнні эканамічнай сітуацыі. "Развіццё эканомікі заўсёды азначае і развіццё грамадства, і развіццё краіны", - лічыць ён.
"Мы па-ранейшаму бачым, што існуе значная розніца паміж узроўнем эканомікі ў ЕС і ўзроўнем эканомікі ў дзяржавах-суседзях. І гэта тое пытанне, якое мы хацелі б вырашыць, і гэтым трэба займацца", - рэзюмаваў еўракамісар па еўрапейскай палітыцы суседства і перагаворах аб пашырэнні ЕС.-0-
