7 лютага, Мінск /Кар. БЕЛТА/. Беларусь зацікаўлена ў канструктыўным дыялогу з Латвіяй, заявіў сёння прэм'ер-міністр Беларусі Андрэй Кабякоў на сустрэчы з латвійскім калегам Марысам Кучынскісам у пашыраным складзе, перадае карэспандэнт БЕЛТА.
Латвія традыцыйна ўваходзіць у лік важных гандлёва-эканамічных партнёраў Беларусі. У 2017 годзе пасля спаду ў папярэднія гады намеціўся рост двухбаковага тавараабароту. У студзені-лістападзе 2017 года тавараабарот склаў ужо амаль $400 млн (127 працэнтаў да аналагічнага перыяду 2016 года). "Гэта нядрэнны паказчык, але пакуль ён далёкі ад тых лічбаў, якія мы мелі некалькі гадоў таму", - адзначыў кіраўнік беларускага ўрада. Высокі ўзровень узаемадзеяння адзначаецца ў інвестыцыйнай сферы, устойліва расце колькасць сумесных прадпрыемстваў.
"Як суседзі і краіны з высокім транзітным патэнцыялам, мы павінны выбудаваць прагматычны, канструктыўны дыялог, развіваючы тэму сумяшчальнасці і ўзаемадзеяння паміж рознымі інтэграцыйнымі працэсамі на нашым кантыненце", - лічыць Андрэй Кабякоў.
Прэм'ер-міністр звярнуў увагу, што транспартна-лагістычная сфера заўсёды была стратэгічным напрамкам супрацоўніцтва ў беларуска-латвійскіх адносінах. Дадатную дынаміку ўзаемадзеяння ў сферы паслуг дэманструюць сектар інфармацыйна-камунікацыйных тэхналогій і туріндустрыя. Андрэй Кабякоў праінфармаваў латвійскага калегу аб падпісанні дэкрэта нумар 8 і стварэнні беспрэцэдэнтных умоў для развіцця бізнесу ў Парку высокіх тэхналогій. Прывабныя ўмовы для латвійскіх кампаній створаны і ў Кітайска-беларускім індустрыяльным парку "Вялікі камень". Наведванне гэтых двух паркаў латвійскай дэлегацыяй запланавана на заўтра.
Па выніках сённяшніх перагавораў Беларусь і Латвія плануюць падпісаць пагадненне аб навукова-тэхнічным супрацоўніцтве, прыярытэтным напрамкам будзе камерцыялізацыя распрацовак. Вялікае значэнне мае цеснае ўзаемадзеянне ў рабоце па ахове і рацыянальным выкарыстанні прыроднай спадчыны Беларусі і Латвіі, алгарытм якога вызначыць праграма супрацоўніцтва паміж экалагічнымі ведамствамі краін на 2018-2022 гады.
Андрэй Кабякоў адзначыў эфектыўнае ўзаемадзеянне абаронных ведамстваў Беларусі і Латвіі, праваахоўных, пагранічных, мытных органаў, выратавальных службаў. Важным складнікам работы ў галіне бяспекі і ўмацавання даверу ў рэгіёне стане рэалізацыя плануемых да падпісання пагаднення аб аператыўным апавяшчэнні аб ядзерных аварыях, абмене інфармацыяй і супрацоўніцтве ў сферы ядзернай бяспекі і радыяцыйнай абароны, пагаднення аб супрацоўніцтве ў галіне авіяцыйнага пошуку і ратавання грамадзянскіх паветраных суднаў.
"Упэўнены, што дамоўленасці, дасягнутыя па выніках візіту ў Беларусь, нададуць дадатковы імпульс развіццю ўзаемадзеяння паміж Беларуссю і Латвіяй і, безумоўна, будуць садзейнічаць стабільнасці і ўстойліваму сацыяльна-эканамічнаму развіццю нашых краін", - рэзюмаваў прэм'ер-міністр.
Марыс Кучынскіс у сваю чаргу адзначыў, што візіт прэм'ер-міністра Латвіі ў Беларусь праходзіць пасля 9-гадовага перапынку. "Вельмі рады, што нашы адносіны характарызуе актыўны палітычны дыялог, - сказаў ён. - Для Латвіі цяперашні візіт вельмі важны".-0-
