11 снежня, Мінск /Кар. БЕЛТА/. Беларусь не плануе станавіцца членам Еўрапейскага саюза, але зацікаўлена ўдзельнічаць у яго ініцыятыве "Усходняе партнёрства". Аб гэтым заявіў сёння намеснік міністра замежных спраў Алег Краўчанка на форуме "Еўрапейскі саюз і "Усходняе партнёрства": падыходы да рэгіянальнага супрацоўніцтва", перадае карэспандэнт БЕЛТА.
"Беларусь не плануе станавіцца членам ЕС, але, паколькі мы з'яўляемся гандлёвымі партнёрамі, у нас вельмі шмат турыстычных, адукацыйных, персанальных сувязей з Еўрасаюзам, мы зацікаўлены непасрэдна ва "Усходнім партнёрстве". Гэты фармат прадастаўляе дадатковыя магчымасці для ўзаемадзеяння ў інтарэсах нашых краін і народаў", - адзначыў Алег Краўчанка.
Намеснік міністра падкрэсліў, што гэта пляцоўка будзе паспяховай толькі ў тым выпадку, калі яе дзейнасць будзе прагматычнай і сфакусіраванай на пэўных праектах. "Гэта ініцыятыва - не вуліца з аднабаковым рухам, і вядома ж, мы не збіраемся выціскаць рэсурсы з ЕС. Мы ўсе зацікаўлены ў бяспецы, працвітанні, эканамічным развіцці і магчымасцях, якія з'яўляюцца для нашых людзей у адукацыі, бізнесе", - сказаў ён.
Алег Краўчанка дадаў, што Беларусь і ЕС маюць намер пачаць перагаворы аб базавым пагадненні. "Мы не плануем заключаць дагавор аб асацыяцыі. У нас павінен быць такі дакумент, як паміж Еўрасаюзам і Расіяй. Нам патрэбна яго заключыць і падпісаць як мага хутчэй", - заявіў ён.-0-
