17 студзеня, Масква /Эдуард Півавар - БЕЛТА/. Беларусь і Расія пачынаюць дыялог аб адзінай палітыцы ў галіне экстрадыцыі. Аб гэтым паведаміў міністр замежных спраў Расіі Сяргей Лаўроў сёння ў Маскве на прэс-канферэнцыі для замежных і расійскіх журналістаў, перадае карэспандэнт БЕЛТА.
"У нас з Беларуссю Саюзная дзяржава, у рамках якой прынята прынцыповае рашэнне выраўноўваць правы грамадзян і адной, і другой краіны ва ўсіх без выключэння галінах, - сказаў Сяргей Лаўроў. - І адной з такіх сфер прыкладання нашых цяперашніх намаганняў з'яўляецца ўзгадненне параметраў адзінай візавай, адзінай міграцыйнай прасторы. Гэта патрабуе вызначэння адзінага спіса асоб, якія непажаданы, якія пажаданы, але гэта таксама патрабуе адзінай палітыкі ў галіне экстрадыцыі. Цяпер гэта тым больш актуальна, таму што ёсць яшчэ тэма аб дамоўленасці паміж Беларуссю і Еўрасаюзам аб стварэнні лагераў для нелегальных мігрантаў на тэрыторыі Беларусі. І ўлічваючы, што ў нас з Беларуссю няма аформленай наземнай сухапутнай граніцы і гэта стварае, вядома ж, пытанні і магчымасці для злоўжыванняў, мы пачынаем з нашымі беларускімі калегамі дыялог на гэту тэму".
Сяргей Лаўроў адзначыў, што беларуска-расійскія перагаворы аб адзінай міграцыйнай палітыцы вядуцца ўжо даўно, цяпер, на яго думку, настаў час іх паскорыць і дасягнуць канкрэтных вынікаў.-0-
