16 студзеня, Мінск /Кар. БЕЛТА/. Беларусь і Егіпет зацікаўлены ў актывізацыі кантактаў паміж парламентамі. Аб гэтым сёння ішла размова на сустрэчы старшыні Палаты прадстаўнікоў Уладзіміра Андрэйчанкі з Надзвычайным і Паўнамоцным Паслом Егіпта ў Расіі і Беларусі (па сумяшчальніцтве) Іхабам Ахмедам Талаатам Насрам, перадае карэспандэнт БЕЛТА.
Уладзімір Андрэйчанка падкрэсліў важнае значэнне міжпарламенцкіх кантактаў у развіцці двухбаковых адносін. "Мы зацікаўлены і павінны зрабіць усё неабходнае, каб актывізаваць кантакты паміж парламентамі дзвюх краін", - сказаў старшыня Палаты прадстаўнікоў.
Спікер прапанаваў арганізаваць узаемныя візіты, у тым ліку на ўзроўні кіраўнікоў парламентаў. Уладзімір Андрэйчанка выказаў перакананасць, што ў хуткім часе бакі маглі б падпісаць пагадненне аб міжпарламенцкім супрацоўніцтве. Ён таксама выступіў за прадаўжэнне актыўнага ўзаемадзеяння на міжнародных парламенцкіх пляцоўках. "Гэта будзе садзейнічаць развіццю гандлёва-эканамічнага супрацоўніцтва, а таксама ўзаемадзеянню ў культуры, адукацыі і турызме", - упэўнены Уладзімір Андрэйчанка.
Парламентарыі будуць рабіць усё магчымае для таго, каб выходзіць на канкрэтныя праекты ў розных сферах, дадаў спікер.
Ён адзначыў высокі ўзровень узаемадзеяння Беларусі і Егіпта на міжнародных пляцоўках, дзе краіны пастаянна аказваюць адзін аднаму падтрымку. Напрыклад, у ААН беларускі бок некалькі разоў выступаў суаўтарам егіпецкіх рэзалюцый.
Беларусь паслядоўна пашырае палітычныя, гандлёва-эканамічныя, культурныя кантакты, у тым ліку на Афрыканскім кантыненце. "Разглядаем Егіпет як важнейшага партнёра, зацікаўлены ў развіцці нашых дружалюбных адносін", - рэзюмаваў Уладзімір Андрэйчанка. Ён нагадаў, што на гэта быў накіраваны афіцыйны візіт Прэзідэнта Беларусі Аляксандра Лукашэнкі ў Егіпет у студзені 2017 года, калі быў падпісаны шэраг важных дакументаў.
У сваю чаргу пасол звярнуў увагу, што візіт беларускага лідара надаў значны імпульс двухбаковым адносінам. Пасол падкрэсліў, што іх "можна ахарактарызаваць як вельмі цесныя". У краін шмат напрамкаў для таго, каб іх развіваць, і дыпламат мае намер унесці ў гэта свой уклад.-0-
