25 красавіка, Мінск /Кар. БЕЛТА/. Бакі канфлікту ва Украіне падтрымліваюць ідэю велікоднага перамір'я, але не ўзгаднілі сумесную заяву. Аб гэтым 24 красавіка па выніках пасяджэння ТКГ паведаміў журналістам спецпрадстаўнік АБСЕ ў кантактнай групе па сітуацыі на ўсходзе Украіны Марцін Сайдзік, перадае карэспандэнт БЕЛТА.
"Бакі ў прынцыпе падтрымлівалі ідэю велікоднага перамір'я (24 красавіка на перагаворах. - Заўвага БЕЛТА), але, на жаль, яны не змаглі прыйсці да адзінага тэксту заявы. Я спадзяюся, што на справе бакі будуць устрымлівацца ад баявых дзеянняў, у прыватнасці на працягу велікодных і майскіх свят", - сказаў дыпламат.
Пацвярджэнне прыхільнасці бакоў да рэжыму спынення агню ў сувязі з надыходзячымі велікоднымі святамі было галоўнай тэмай дыскусіі ў рабочай групе па бяспецы.
Гуманітарная падгрупа прадоўжыла дыскусію па тэме абмену ўтрымліваемымі асобамі ў сувязі з канфліктам і ўмовамі іх утрымання. Эканамічная рабочая група пры ўдзеле новага кіраўніка дэлегацыі Міжнароднага камітэта Чырвонага Крыжа ва Украіне Фларанс Жылет разгледзела актуальныя пытанні водазабеспячэння. Абмяркоўваўся, у прыватнасці, капітальны рамонт Пятроўскага вадавода ў Луганскай вобласці. Палітычная рабочая група абмяркоўвала бягучыя актуальныя пытанні. Паводле слоў Марціна Сайдзіка, закранаўся і падпісаны 24 красавіка ўказ прэзідэнта РФ аб увядзенні спрошчанага парадку выдачы расійскіх пашпартоў жыхарам асобных раёнаў Луганскай і Данецкай абласцей Украіны. "Я заўсёды прытрымліваўся літары і духу мінскіх пагадненняў, якія грунтуюцца на ідэях суверэнітэту і тэрытарыяльнай цэласнасці Украіны", - пракаменціраваў новаўвядзенне дыпламат.
Марцін Сайдзік таксама павіншаваў грамадзян Украіны з праведзенымі прэзідэнцкімі выбарамі, якія прайшлі ў адпаведнасці з міжнароднымі стандартамі. Ён павітаў заяву будучага прэзідэнта Украіны Уладзіміра Зяленскага наконт таго, што пры ім краіна ў любым выпадку будзе дзейнічаць у нармандскім фармаце, будзе прадаўжаць мінскі працэс. "Для мяне самае галоўнае тое, што ён будзе прадаўжаць мінскі працэс, гэта самая важная канстатацыя", - адзначыў Марцін Сайдзік.
Акрамя таго, спецпрадстаўнік нагадаў, што два гады таму ў Луганскай вобласці пры ўзрыве аўто загінуў член СММ АБСЕ Джозэф Стоўн: "Я цалкам падтрымліваю намаганні кіраўніка СММ пасла Апакана, накіраваныя на тое, каб такі выпадак больш не паўтарыўся". Ён таксама падкрэсліў, што СММ ва Украіне - самая вялікая місія ў гісторыі АБСЕ. "Я настойліва заклікаю бакі да забеспячэння бяспекі персаналу, маёмасці СММ і стварэння ўмоў для бесперашкоднай дзейнасці місіі згодна з яе мандатам. У сувязі з гэтым хачу адзначыць, што 18 красавіка ў Данецкай вобласці паблізу лініі сутыкнення ў выніку шэрага перашкод разбіўся беспілотны лятальны апарат СММ АБСЕ далёкага радыуса дзеяння. Гэта ўжо трэці выпадак на працягу прыблізна аднаго года. БПЛА - гэта сур'ёзнае і дарагое абсталяванне, якое аплачваецца з бюджэту краін - удзельніц місіі, гэта значыць падаткаплацельшчыкамі", - заўважыў дыпламат.
У сувязі з надыходзячымі святамі наступная сустрэча трохбаковай кантактнай групы адбудзецца ў Мінску 22 мая. Пры неабходнасці да гэтага будуць праведзены відэаканферэнцыі.-0-
