Фестываль "Залаты шлягер" акумулюе лепшыя дасягненні славянскай і еўрапейскай культуры, беражліва захоўвае традыцыі музычнага мастацтва. На гэта 24 кастрычніка звярнуў увагу міністр культуры Беларусі Юрый Бондар, адкрываючы ў Магілёве міжнародны форум, перадае карэспандэнт БЕЛТА.
"Яркае і цікавае свята музыкі даўно стала візітнай карткай горада на Дняпры як аднаго з цэнтраў фестывальнага руху Беларусі, багатага сваімі традыцыямі культурнага рэгіёна краіны, - сказаў Юрый Бондар. - Нездарма сюды ў гэтыя рамантычныя па настроі восеньскія дні з задавальненнем імкнуцца прыехаць знакамітыя артысты, выдатныя творчыя калектывы. Яны зноў і зноў з захапленнем будуць выконваць лепшыя песні, якія не проста былі шлягерамі, а сталі сімваламі свайго часу, з'яўляюцца дасканалымі сваім хараством і таму сталі любімымі соцень тысяч людзей".
Міністр культуры падкрэсліў, што на працягу свайго існавання "Залаты шлягер" неаднаразова пацвярджаў высокі ўзровень, які не ўступае еўрапейскім стандартам такіх мерапрыемстваў.
Таксама ён адзначыў, што кожны "Залаты шлягер" мае сваё непаўторнае аблічча. У гэтым годзе ў праграме прымуць удзел лепшыя калектывы і выканаўцы краіны: Нацыянальны акадэмічны канцэртны аркестр Беларусі пад кіраўніцтвам Міхаіла Фінберга, вакальная група "Камерата", Ядвіга Паплаўская, Анастасія Ціхановіч, Ірына Дарафеева.
"Перакананы, што гэта значная культурная падзея пакіне яркае добрае святло ў душы ва ўсіх аматараў музыкі, будзе садзейнічаць далейшаму развіццю і папулярызацыі нацыянальнага беларускага мастацтва, а таксама ўмацаванню дружбы і супрацоўніцтва музыкантаў і прафесіяналаў розных краін", - рэзюмаваў Юрый Бондар.
Ён пажадаў усім удзельнікам і гасцям фестывалю творчага натхнення, невычэрпнай энергіі, шчасця і дабра.
Міжнародны музычны фестываль "Залаты шлягер" праходзіць у Магілёве 22-29 кастрычніка. У ім прымаюць удзел артысты з 9 краін.
Гасцей і жыхароў горада на Дняпры, якія прыйшлі на афіцыйнае адкрыццё форуму, 24 кастрычніка радавалі хіты ў выкананні народнай артысткі Беларусі Ядвігі Паплаўскай, заслужанай артысткі Беларусі Ірыны Дарафеевай, Віктара Рыбіна і Наталлі Сенчуковай (Расія), Вольгі Пірагс (Латвія), Афрыка Сімона (Германія), Квенціна Мура (ЗША), Алега Жукава, Анастасіі Ціхановіч, ансамбля "Добры Молодцы", групы "Джой" (Аўстрыя). Вядучымі канцэртнай праграмы былі Вольга Шлягер і Дзяніс Дудзінскі.
