Валанцёры ўносяць неацэнны ўклад у фарміраванне пазітыўнага іміджу краіны. Такое меркаванне журналістам выказаў першы намеснік кіраўніка Адміністрацыі Прэзідэнта, першы віцэ-прэзідэнт НАК Максім Рыжанкоў перад адкрытым дыялогам, прымеркаваным да падрыхтоўкі беларускай валанцёрскай каманды для работы на II Еўрапейскіх гульнях 2019 года ў Беларусі, перадае карэспандэнт БЕЛТА.
"Нездарма сённяшняе мерапрыемства пройдзе пад лозунгам "Валанцёр - душа спорту". Калі мы гаворым пра спорт, то ад валанцёра многае залежыць. Чалавек, які прыязджае на спаборніцтвы, - спартсмен, трэнер або госць - сканцэнтраваны на самім спаборніцтве. У многім менавіта ад усмешак валанцёраў, добразычлівасці, гатоўнасці дапамагчы, вырашыць нейкія пытанні складваецца ўражанне аб нашай краіне", - сказаў Максім Рыжанкоў.
Паводле яго слоў, на валанцёры ляжыць вялікая адказнасць, у тым ліку ён павінен растлумачыць, куды звярнуцца пры страце дакументаў, падказаць, дзе знаходзяцца спартыўныя аб'екты, транспарт, на якім можна туды дабрацца, азнаёміць з графікам спаборніцтваў. Калі ў аэрапорце гасцей будуць сустракаць добразычлівыя валанцёры, што размаўляюць на мове грамадзян, якія прыедуць, - гэта вельмі важна для іміджу Беларусі як маладой дзяржавы, адзначыў ён.
